«Туллукчаан» оҕо бибилэтиэкэтэ айар иэйии кырдалыгар ыҥырда. Ол курдук, Тааттатааҕы Ф.С. Аргунов аатынан Оҕо искусствотын Тааттатааҕы оскуолатын дьүһүннүүр-ойуулуур кыһатын бүтэрээччи, Бүтүн Россиятааҕы, өрөспүүбүлүкэтээҕи араас таһымнаах күрэхтэр призердара, эдэр худуоһунньук Сара Алексеева «Бастакы» диэн айар быыстапкатын кэрэни кэрэхсээччилэргэ тэрийдэ. Экспозицияҕа живопись, уруһуй, пластилинтан дьоҕус скульптура, туой оҥоһук, ону сэргэ хаартыскалар – барыта 31 үлэ көрдөрүүгэ турда. Ретроспективнай быыстапка быыһын сэгэттэххэ, үөрэх үлэлэриттэн саҕалаан, олоҥхо, дьыл кэмин тиэмэтигэр, скетч, пленэр суруйуулара көрөөччү дьүүлүгэр таҕыста.
Тааттатааҕы норуот айымньытын дьиэтин дириэктэрин солбуйааччы, СӨ култууратын туйгуна, норуот маастара, худуоһунньук Марианна Вячеславовна Степанова санаатын үллэһиннэ:
–Сахабыт сирин муҥутуур тымныы күнүгэр сылаас иэйиилээх, айымньылаах түһүлгэҕэ сылдьан, кэлбит дьон бары астынныбыт. Эдэр худуоһунньук эгэлгэ араас ньыманан уруһуйдара, уран оҥоһуктара, хаартыскалара ураты буочардаахтарын бэлиэтии көрдүбүт. Ааптар дойдуга тапталын үлэлэрэ туоһулууллар.
Ийэтэ, ону сэргэ учуутала Саргылана Константиновна Билюкина:
–Саара оҕо эрдэҕиттэн утумнаах, дьаныардаах үлэтинэн айар суолга маҥнайгы хардыытын оҥордо. Бэйэтэ туспа буочара, өҥү дьүөрэлээн көрүүтэ, үлэ тутулун анаарыта — бу кини бэйэтин ис туругун арыйыыта буолар,–диир.
Уруһуйдьут Сараҕа кустук өҥнөөх күндэл көҥүлэ угуйа турдун, алыптаах дьоҕурун ураты урсуна кэрэни үксэтэ турдун диэн баҕа санаабын тиэрдэбин.
Лия Маркова, IX кылаас,
“Ситим” эдэр кэрэспэдьиэннэр кулууптара, Таатта.