Таптыыр дьарыгым – мин үлэм

Федорова Любовь араас сыттаах чүмэчи оҥоруутунан сөбүлээн дьарыктанар. Киниттэн биһиги маннык интервью ыллыбыт.

– Үлэҥ сыалын туһунан кэпсээ.

– Соевай чумэчи оҥорортон ураты, мин таас бытыыккалары быһан иккис тыын биэрэр дьарыктаахпын. Бытыыкканан ваза, стакан, хаппахтаах иһит оҥоробун. Таас бытыыкка сиргэ 1000-5000 сыл сытар. Ол иһин бөх тахсарын аччатаары мин маннык дьарыктаныыһыкпын диэн толкуйдаммытым. Чүмэчим иһитигэр эмиэ быһыллыбыт бытыыккалары туһанабын. Бөх тахсыытын аччатыы мин үлэм сүрүн сыала буолар.

–  Чүмэчи оҥорор санаа хайдах, ханна сырыттаххына кэлбитэй?

– Декретка олорон элбэхтэ интернет хаһар этим. Онно чумэчи арааһын оҥороллорун көрөн сэҥээрбитим.

–  Чүмэчи оҥорор ыарахан дуо? Тоҕо?

– Чумэчи онорор олох ыарахана суох, медитация курдук үлэ диэххэ сөп. Ону таһынан элбэх бириэмэни ылбат.

– Араас сыт туһунан кэпсээ. Ханнык-ханнык араастардааҕый? Дьон үксэ тугу сөбүлээн сакаастыырый?

– Сыт хас да араастаах, ол курдук: фруктовай, сибиэһэй, от-мас, сибэкки, прянай, минньигэс аһылык сыттаах. Дьон үксэ минньигэс сыттааҕы талан ылар. Холобур, фруктовай сыттаах чүмэчини элбэх дьон ордорор.

– Үлэҥ уратыта туохха сытарый?

– Уратым диэн чумэчибин таас бытыыккалары быһан иһиттиибин. Ону таһынан, чумэчим састааба 100% киһиэхэ буортута суох, нууччалыы эттэххэ натуральнай, парафины туһаммаппын. Парафины ньиэптэн оҥороллор. Бу киһиэхэ уонна айылҕаҕа куһаҕаннык дьайар.

–  Маастар кылаас оҥороҕун дуо?

– Хас биирдии айар-тутар үлэнэн дьарыктанар киһи үлэ процеһыттан уонна үлэтин түмүгүн көрөн астынар. Ону таһынан, дьон туттубут бытыыккаларын сууйан-сотон, айылҕаны харыстыыр сыаллаах миэхэ аҕалан туттаралларыттан, олус үөрэбин. Маастар кылаас ыытабын. Сурутуунан, эбэтэр биллэрии таһааран дьону ыҥырабын.

– Инникигэ былааҥҥын сырдат.

– Маннык курдук салгыы үлэлии турар былааннаахпын. Дьарыктанарбар уонна маастар кылаас ыытарбар мастарыскыай арыйыахпын баҕарабын.

Билсэр төл.: +79244695815 (Whatsapp)

Текст: Халыева Ольга