Кулун тутар 13-15 күннэригэр Дьокуускай куоракка «Төрөөбүт тыл уонна төрөөбүт литература бастыҥ учуутала» өрөспүүбүлүкэтээҕи куонкурус үһүс төгүлүн ыытылынна.
Куонкурус бары түһүмэхтэрэ Донской –II аатынан Үөрэҕи сайыннарар уонна идэни үрдэтэр институкка, А.Г. уонна Н.К. Чиряевтар ааттарынан национальнай гимназияҕа, «Айыы Кыһата» национальнай гимназияҕа ыытылыннылар.
«Күрэскэ өрөспүүбүлүкэ араас улуустарыттан 12 саха тылын уонна 1 алын сүһүөх кылаастарга долган тылынан литература ааҕыытын үөрэтэр учуутал кытыннылар. Быйылгы куонкурус биир уратытынан 4 кыттааччы хотугу улуустан баар. Ол курдук, Орто Халыматтан, Үөһээ Дьааҥыттан, Абыйтан, Анаабыртан кэлбиттэр. Күрэх кэтэхтэн уонна манна миэстэтигэр ыытыллар түһүмэхтэрдээх. Кэтэхтэн түһүмэххэ бэйэлэрин үлэлэрин сырдатар видео бэлэмнээн ыыппыттара. Биллэн турар, учуутал идэтин таһымын, маастарыстыбатын көрдөрөр сүрүн түһүмэхтэр уруок уонна кылаас чааһа буолаллар. Ону сэргэ үөрэтэр методикаларын, кистэлэҥнэрин, сатабылларын сыратар түһүмэхтэр эмиэ бааллар», – диэн Донской –II аатынан Үөрэҕи сайыннарар уонна идэни үрдэтэр институт үөрэх чааһыгар сэбиэдиссэйэ Февронья Ядрихинская кэпсээтэ.
Икки күннээх күрэс кэнниттэн финалга 5 учуутал таҕыста. Ол курдук, М.А. Алексеев аатынан Үөһээ Бүлүүтээҕи лиссиэй-интэринээт учуутала Маргарита Николаевна Анисимова, И.С. Гаврильев аатынан 1-кы нүөмэрдээх Нам орто оскуолатын учуутала Лариса Дмитриевна Данилова, Таатта улууһун Э.К. Пекарскай аатынан Игидэй орто оскуолатын учуутала Варвара Константиновна Ефимова, Мэҥэ Хаҥалас улууһун 2-с нүөмэрдээх Аллараа Бэстээх орто оскуолатын учуутала Галина Борисовна Никифорова, А.Е. Слепцов аатынан Абый орто оскуолатын учуутала Анна Николаевна Чиркова маастар-кылаастары көрдөрдүлэр.
«Төрөөбүт тыл уонна төрөөбүт литература бастыҥ учуутала» өрөспүүбүлүкэтээҕи куонкурус муҥутуур кыайыылааҕынан И.С. Гаврильев аатынан 1-кы нүөмэрдээх Нам орто оскуолатын учуутала Лариса Дмитриевна Данилова буолла. «Үс күн устата өрөспүүбүлүкэ араас оскуолаларын киэҥ билиилээх, баай уопуттаах учууталларын кытта үлэлэһэн, күрэстэһэн, элбэҕи биллим, үгүскэ үөрэнним. Кыайыылаах аатын сүгэн, олус үөрдүм, долгуйдум. Улахан эппиэтинэс диэн өйдүүбүн. Туох баар кыһамньыбын, билиибин ууран туран, өрөспүүбүлүкэм аатыттан дойду таһымыгар чиэстээхтик кыттарга дьулуһуом диэн эрэннэрэбин», – диэн кыайыылаах санаатын үллэһиннэ.
Лариса Данилова бу сыл балаҕан ыйыгар Татарстан өрөспүүбүлүкэтигэр төрөөбүт тыл уонна төрөөбүт литература учууталларын бүтүн Арассыыйатааҕы күрэҕигэр кыттыаҕа.
keskil14.ru