Бу ааспыт нэдиэлэҕэ дойдубут үрдүнэн Ленинград куорат блокадаттан босхоломмутун бэлиэтээтибит. Ньурба оройуонун Хаҥалас орто оскуолатыгар эмиэ бу бэлиэ күнү ахтан-санаан аастыбыт. Тэрээһини «Сата» куруһуок салайааччыта уонна иитиллээччилэрэ иилээн-саҕалаан ыыттылар. Бу куруһуок В. А. Петрова аатынан олохтоох кыраайы үөрэтэр түмэл иһинэн үлэлиир буолан түмэл үлэһиттэрэ кытыннылар.
Бастаан куруһуок уолаттара Ленинград блокадатыгар анаммыт хоһооннору өйтөн аахтылар. Куруһуок салайааччыта З.В. Анисимова блокада туһунан дьиҥ чахчы олохтоохтор кэпсээннэригэр олоҕуран кинилэр ыар дьылҕаларын кэпсээтэ. Онтон Олег Адамов Пискарёвскай кылабыыһаҕа сылдьыбытын, сибэкки дьөрбөтүн уурбутун туһунан сырдатта. Виолетта Иванова олус өйдөөх, хорсун быһыылаах Трезорка диэн ыт олохтоохторго көмөтүн оҕолорго иһитиннэрдэ. Ыаллыы сытар Акана нэһилиэгэр олорбут, Ленинград куораттан төрүттээх Лариса Тарасовна Иванова олоҕун туһунан оҕолор эмиэ бу күн биллилэр. Бибилэтиэкэ үлэһитэ М.Н. Николаева үгэс быһыытынан оҕолорго көхтөөх викторина ыытта. Манна бастыҥынан 8 кылаас үөрэнээччитэ Эльдар Мордовской буолла. Түмүгэр Олеся Петрова, Семен Анисимов уонна мин бу ааспыт эрээри ыар кэмнэр тустарынан хоһоон аахтыбыт.
Дьэ, бу курдук бэриммэтэх Ленинград куорат Аҕа дойду сэриитин кэмигэр блокадаҕа олорбутун, биһиги Кыһыл Аармыйабыт тоҕо көтүү оҥорон босхолообутун туһунан суолта ууран дьоһуннаахтык бэлиэтээтибит.
Анжелина Жданова, «Ыллык» эдкорпост, Ньурба, Хаҥалас.