Алтынньы ыйга ыытыллар аҕам саастаах дьоннор күннэригэр анаан биһиги оскуола оҕолоро кылаастарынан бочуоттаах сынньалаҥҥа олорор бэтэрээн үлэһиттэри убаастаан, болҕомто ууран эҕэрдэнэн, үлэнэн тахсабыт.
Сорох кылаастар көмөҕө наадыйар дьоҥҥо тимуровскай үлэ тэрийбиттэрэ уонна бары 1- 11 кылаастар анаммыт аҕам саастаах бэтэрээн үлэһиттэргэ дьиэлэригэр сылдьан, эҕэрдэ тылларын эттилэр, сэмэй бэлэхтэрин туттарбыттара. Оҕолор хоhоон ааҕан, кэпсээн-ипсээн, кыратык да буоллар сэргэхситэн ыллылар.
Тохсус кылаас коллектива Николаева Анастасия Ионовнаҕа мас саһааннаан, сэттис кылаастар Иванов Иван Кимовичка буочкалартан уу таһан күүс – көмө, өйөбүл буоллулар. Маннык көмө, үтүө дьыаланы оҥоруу сааскы кэмҥэ ордук ыытыллар.
Күндү дьоммутун эҕэрдэлиибит, баҕарабыт чэгиэн доруобуйаны, уһун үйэлээх олоҕу, үтүө – кэрэ кэмнэри, үөрүүлээх түгэннэри!
Петрова Инга, 9 кылаас
«Көмүс бөрүө” пост.
М.А.Алексеев аатынан Баппаҕаайы оскуолата,
Илбэҥэ, Бүлүү