Бэс ыйын 4 күнүгэр Чурапчы улууһугар “Боотур Уус сыдьааннара” муниципальнай бырайыак чэрчитинэн, Оҕо аймах уйгулаах ыһыаҕа оскуола үөрэнээччилэрин уонна уһуйаан иитиллээччилэрин түмтэ. Ыһыахха араас күрэхтэһиилэр ыытылыннылар.
Онтон биирдэстэринэн Саха АССР спордун маастара, Арассыыйа суруналыыстарын сойууһун чилиэнэ, суруйааччы, учуутал, тренер Д.Д. Эверстов-Дмитрий Диринскэй 80 сааһыгар анаммыт атах оонньууларыгар күрэхтэһии буолар. Оҕолор сааһынан, кыыс, уол диэн арахсан кыттыыны ыллылар.
***
Николай Николаевич Романов, С.К. Макаров аатынан Чурапчы гимназиятын физкультура учуутала, күрэх сүрүн суудьуйата:
– Бүгүҥҥү күрэх этэҥҥэ, үчүгэйдик ааста. Оҕолор бэркэ кытыннылар. Киһи атаҕа күүстээх буоллаҕына уһун үйэлээх буолар. Ыстаныынан сөптөөхтүк дьарыктаннахха, кыаҕын арыллар. Ыстаныы доруобуйаҕа улахан туһалаах.
***
Алгыс Халгаев, Одьулуун орто оскуолатын X кылааһын үөрэнээччитэ, II үрдэл кыайыылааҕа:
– Бүгүн ыһыахха атах оонньуутугар уонна мас тардыһыытыгар кытынным. Атах оонньуутунан күүскэ дьарыктамматарбын даҕаны, күрэхтэргэ сөбүлээммин кыттабын. Эрчиллэн, сөптөөхтүк дьарыктана сылдьыахха наада. Билигин номнуо сайыммыт кэллэ. Мин таһырдьа дьарыктанарбын ордоробун. Ыстаныынан дьарыктанар киһи атаҕа күүһүрэр, иҥиирэ сайдар. Уонна доруобуйата тупсар.
***
Виолетта Захарова, Хатылы орто оскуолатын VI кылааһын үөрэнээччитэ, I үрдэл кыайыылааҕа, Дмитрий Диринскэй аатынан анал бириис хаһаайката:
– Спордунан утумнаахтык дьарыктанабын. Чуолаан сүүрүүгэ 5-c кылааска киирбитим. Ыстаныыны эмиэ сэҥээрэбин. Ханнык баҕарар спорт көрүҥэр тренериҥ тылын истэн, күүскэ дьарыктанарsy ирдэнэр. Доруобуйаҕа туһалааҕын өйдөөн туран, үөрэ-көтө сөптөөхтүк дьарыктанар ордук. Оччоҕо чөл туруктаах, чэгиэн доруобуйалаах буолаҕын.
***
Күрэх түмүгүнэн миэстэлэспиттэргэ мэтээл уонна добун сурук туттардылар. Ону таһынан муҥутуур кыайыылаахтар мүһэ уонна Дмитрий Дмитриевич дьиэ кэргэнин аатыттан бэлиэ сурук, анал бириис туттулар. Оҕолор олус көхтөөхтүк кытыннылар. Хас биирдии кыттааччы бэйэтин кыаҕын көрдөрдө.
Оҕолор чөл олоҕу тутуһан, спорду талан, таптаан астына-дуоһуйа күрэхтэһиигэ кытталларын көрөн киһи үөрэр. Кинилэр биһиги өбүгэлэрбит төрүт оонньууларын үйэтитэллэр, сайыннараллар. Спорду таптааҥ, спордунан дьарыктаныҥ!
Маша СИБИРЯКОВА, X кылаас, “Тумус кыһа” медиа киин,
С.К. Макаров аатынан Чурапчы гимназията