Чурапчыга ыытыллыбыт “Снежный барс” XXV өрөспүүбүлүкэтээҕи байыаннай-спортивнай оонньууларга Үөһээ Бүлүү улууһун Дүллүкү нэһилиэгиттэн кытта кэлбит оҕолорго киһи хараҕа тута быраҕыллар. Кинилэр барыларыттан ураты формалаахтар. Онон сирдэтэн оҕолору кытта кэпсэттим.
Дүллүкүттэн уопсайа 10 оҕо салайааччыларын кытта кэлбиттэр. Уолаттар футболкаларыгар биир дойдулаахтара, анал байыаннай дьайыылар кыттыылааҕа Степан Руфов хаартыскатын түһэрбиттэр. Хорсун буойун анал байыаннай дьайыыларга барыан иннинэ физкультура учууталынан үлэлээбит. Кини Саха өрөспүүбүлүкэтин хотугу многоборьеҕа спорт маастара эбит. Хорсун быһыы уордьанын кавалера, «Хорсунун иһин» мэтээллээх. Эдэр киһи ытык иэһин төлүү сылдьан, сырдык тыына быстыбыт…
Биир дойдулаахпытын кэриэстээн, формабытыгар кини мэтириэтин илдьэ сылдьабыт. Степан Руфов биһиги сүрэхпитигэр өрүү тыыннаах, – диэн Дүллүкү оҕолоро санааларын үллэһиннилэр.
Кира ГАВРИЛЬЕВА, VII кылаас,
С.Д. Флегонтов аатынан Хадаар орто оскуолата, Чурапчы