Бэс ыйын 6 күнүгэр Дьокуускай куоракка Н.Н. Тарскай аатынан “Туймаада” стадиоҥҥа Саха Өрөспүүбүлүкэтин үөрэнээччилэрин Сайыҥҥы спартакиадатын үөрүүлээх арыллыыта буолла.
Спартакиада арыллыытыгар ордук спортсменнар парадтарын сөбүлээтим. Бары улуустарынан бииртэн биир үчүгэй спортивнай формалаах “Туймаада” стадион устун киэн тутта хаамтылар. Бары бэлэмнээхтэрэ, кыайыыга дьулуурдаахтара көстөр. Оҕо спордун бырааһынньыгын Герман уонна Клавдия Хатылаевтар салайааччылаах “Тэтим” ансаамбыл, “Тускул” култуура киинин коллектива “Кындыкан” үҥкүүтүнэн, “Версия” аныгылыы үҥкүү ансаамбыла киэргэттилэр. Имигэстэрин, мостик түспүттэрин сэргии көрдүм.
Кэскил Баишев “Саҕахтан саҕахха” диэн ырыатын тыыннаах толоруутун истэммин астынным, тэҥҥэ ылластым.
Үөрүүлээх арыллыыга киһи бөҕөтө кэлбит. Бары үөрэ-көтө сылдьаллар. Көрөргө наһаа үчүгэй.
Мин Амма улууһун баһылыгын социальнай боппуруостарга солбуйааччы Нюргуяна Ивановна Илларионованы көрсөн кэпсэттим. Нюргуяна Ивановна эппитин курдук, Сайыҥҥы спартакиадаҕа Амма улууһуттан 59 оҕо кыттыыны ыла сылдьар. Хамаанда ситиһиилээхтик кыттарга эрэллээх.
— Оҕолорбут Спартакиада 13 көрүҥүттэн 12-гэр кытта сылдьабыт. Бэҕэһээ хамаандабыт мандаты этэҥҥэ ааста. Оҕолорбутун үөрдэн-көтүтэн, кыайыыга кынаттаан, спортивнай форма сакаастаабыппыт. Оҕо формалаах буоллаҕына, кырдьык, спорт киниэхэ бырааһынньык курдук буолар, – диэн Нюргуяна Ивановна Илларионова санаатын үллэһиннэ уонна Сайыҥҥы спартакиаданы тэрийээччилэргэ үөрэх министиэристибэтигэр, Ил Дархаммытыгар Айсен Сергеевич Николаевка оҕо спордун бырааһынньыгын бэлэхтээбиттэригэр махталын тиэрдэр. https://t.me/keskil_media2020/6097
Оҕолор Сайыҥҥы спартакиадалара бу курдук сылын аайы ыытылла турарыгар баҕарабын.
Алена Ксенофонтова, “Кэскил” медиа-оскуола юнкора, Хадаар, Чурапчы.