Биһиги нэһилиэкпитигэр икки педагогическай династия баар: Александровтар уонна Устиновтар. Бу үтүөкэн дьон сүрэхтэрин сылааһын, олохторун оҕо иитиитигэр, саха сайдар саргытын туһугар туруулаһан үлэлээбит уонна үлэлии сылдьар учууталлар, иитээччилэр буолаллар.
Александровтар аймах былыр-былыргыттан Амма Наахара сиригэр-уотугар олохсуйан олорбуттара. Династия Лаврентий Лаврентьевич, Семен Лаврентьевич, Игнатий Лаврентьевич үс бырааттыы учууталлартан саҕаламмыта. Онтон Александровтар династияларыгар халыҥ аймахтар Мартыновтар, Яковлевтар, Ксенофонтовтар, Окороковтар, Габышевтар, Николаевтар киирэн ситиһиилээхтик үлэлии сылдьаллар. Барыта 53 чилиэн баар, уопсай педагогическай стаж 1073 сыл буолла. Билигин Александровтар педагогическай династияларын Саха Өрөспүүбүлүкэтин үтүөлээх учуутала Зоя Семеновна Александрова салайар. Өрөспүүбүлүкэ араас муннугар династияны утумнааччылар үлэлии-хамсыы, айа-тута сылдьаллар. Оттон Амма Наахара оскуолатыгар 6, оҕо уһуйааныгар 3 династия чилиэттэрэ үлэлииллэр.
![](https://keskil14.ru/wp-content/uploads/2023/11/PHOTO-2023-10-09-16-00-12-1-1024x634.jpg)
![](https://keskil14.ru/wp-content/uploads/2023/11/PHOTO-2023-10-09-16-00-11-1.jpg)
2010 с. Учуутал сылыгар Устиновтар киэҥ аймахха «Педагогическай династия» үрдүк аат иҥэриллибитэ. Династия төрүттээччитэ Евсей Егорович Устинов алын кылаас учуутала этэ, 24 сыл устата дойдутугар Аммаҕа үлэлээбитэ. Билигин династияҕа 35 педагог баар. I көлүөнэҕэ 5 педагог киирэр. Уопсай педстажтара 89 сыл. Евсей Егорович быраата Никита Егорович быраата эмиэ алын кылаас учуутала этэ. Үлэлии сылдьан, Аҕа дойду улуу сэриитигэр баран, сураҕа суох сүппүтэ. Ефремова Татьяна Петровна алын кылаас учуутала. Устинова Роза Пантелеймоновна 8 сыл директорынан үлэлээбитэ, химия, биология учуутала. Никифоров Егор Михайлович география, история учууталынан үлэлээбитэ.
![](https://keskil14.ru/wp-content/uploads/2023/11/PHOTO-2023-10-09-16-49-29-1024x1024.jpg)
![](https://keskil14.ru/wp-content/uploads/2023/11/PHOTO-2023-10-09-16-49-30-1024x768.jpg)
![](https://keskil14.ru/wp-content/uploads/2023/11/PHOTO-2023-10-09-16-49-31-2-1024x693.jpg)
![](https://keskil14.ru/wp-content/uploads/2023/11/PHOTO-2023-10-09-16-49-30-1-1-1024x769.jpg)
![](https://keskil14.ru/wp-content/uploads/2023/11/PHOTO-2023-10-09-16-49-31-1-2-768x1024.jpg)
35 педагог бары холбоон уопсай педагогическай стажтара 769 сыл. 3 учуутал сэрии бэтэрээнэ буолаллар. 10 педагог Саха Өрөспүүбүлүкэтин үөрэҕириитин туйгуна, 4 педагог Российскай Федерация уопсай үөрэхтээһинин Бочуоттаах үлэһитэ, 3 киһи «Учууталлар учууталлара» анал ааттаахтар. Династия чилиэттэрэ С.Е. Коврова педагогическай наука кандидата, И.Н. Матвеев техническэй наука кандидата буолаллар. 4 учуутал Саха өрөспүүбүлүкэтин педагогическай энциклопедиятыгар киирбиттэрэ.
Билигин Амма Наахара оскуолатыгар 5, «Дуораанчык» уһуйааҥҥа 1 педагог үлэлииллэр. Өрөспүүбүлүкэ араас муннугар Устиновтар сыдьааннара оҕону үөрэтиигэ-иитиигэ бэйэлэрин кылааттарын киллэрэн, айа-тута, үлэлии-хамсыы сылдьаллар.
Амма Наахара педагогическай династияларын туһунан бу видеоҕа көрүҥ
Алина МАРТЫНОВА, XI кылаас,
«Аартык» медиа киин кэрэспэдьиэнэ,
Амма Наахара орто оскуолата
Амма