Ахсынньы 11 күнүгэр оскуолабытыгар “Герой оскуолата” диэн улуустааҕы патриотическай форум буолан ааста. Кыттааччылар “Саха Өрөспүүбүлүкэтин чулуу дьонноро” диэн бырайыактыыр үлэ сессиятыгар кыттыыны ыллылар. Бу үлэ 5-11 кылаас үөрэнээччилэригэр аналлаах “Саарыннар суолларынан (Мой путь)» иитии программатыгар ананна. Биһиги кыттааччылары көрсөн кэпсэттибит.
Уйгулаана Егоровна Зыкова, Мэҥэ Хаҥалас улууһун Аллараа Бэстээх 2 №-дээх оскуолатын иитэр үлэҕэ дириэктэр сүбэһитэ:
– “Саарыннар суолларынан (Мой путь)» программаҕа Саха сирин 9 саарына киирэ сылдьар. Биһиги хамаандабытыгар Алексей Елисеевич Кулаковскай-Өксөкүлээх Өлөксөй түбэстэ. Биһиги норуоппут тумус туттар киһитэ Өксөкүлээх Өлөксөй олоҕун оҕолорго билиһиннэрэр, кини айар үлэтин оҕолорго кэпсиир сыаллаах иитии үлэтигэр тугу киллэриэхпитин сөбүн туһунан толкуйдаатыбыт. Өксөкүлээх төрөөбүт күнүгэр – кулун тутар 16 күнүгэр оскуола үөрэнээччилэрин барытын түмэр биир улахан тэрээһини ыытыахпытын сөп.
Онтон Аллараа Бэстээх оскуолатын 9-с кылааһын үөрэнээччитэ Анатолий Степанов, Матта орто оскуолатын 10-с кылааһын үөрэнээччитэ Ярослав Григорьев биһиги Бастакы президеммит Михаил Ефимович Николаев туһунан кэпсиир бырайыагы оҥордулар.
Мария Ивановна Плюк, Бэдьимэ орто оскуолатын иитэр үлэҕэ дириэктэр сүбэһитэ:
– Биһиги хамаандабыт сахалартан бастакы Олимпийскай чемпион Роман Михайлович Дмитриев олоҕун кэрчиктэрин оҕолорго чугастык билиһиннэрэр бырайыагы оҥорон кэпсээтибит.
Саргылаана Николаевна Петрова, Төҥүлү орто оскуолатын иитэр үлэҕэ дириэктэр сүбэһитэ:
– Биһиги хамаандабыт Алексей Елисеевич Кулаковскайы – Өксөкүлээх Өлөксөйү билиҥҥи оҕолорго хайдах билиһиннэрэрбит туһунан толкуйдуубут. Кини төрөөбүт күнүгэр кулун уттар 16 күнүгэр “Өксөкүлээх суолунан” диэн виртуальный маршрут оҥоруохпутун сөп. Хас биирдии оҕо биллиилээх дьоннорун билэ, холобур оҥосто улаатара наада.
Ангелина Семеновна Сергучева, Хорообут орто оскуолатын иитэр үлэҕэ дириэктэр сүбэһитэ:
– Аҕа дойду Улуу сэриитигэр сахалартан бастакы Сэбиэскэй Сойуус Геройа Федор Кузьмич Попов олоҕун, кини хорсун быһыытын сырдатыыга “Дни единых действий” иһинэн герой туһунан ырыанан марафону ыытар туһунан кэпсэтэ олоробут. Бу чинчийэр, айар бырайыак буолуон сөп. Оҕо ырыа суолтатын, ааптардарын, историятын, ырыа нөҥүө герой хорсун быһыытын дириҥник билэллэригэр туһалаах буолуо дии саныыбын.
Ити курдук оскуолабытыгар буолан ааспыт тэрээһинтэн саха саарыннарын туһунан биллибит. Кинилэр биһиэхэ сирдьит буолаллар.
Ванесса БАИШЕВА, Х кылаас, Аэлита ФЕДОРОВА, VII кылаас,
Ф.К. Попов аатынан Баатара орто оскуолата, Мэҥэ Хаҥалас
Арсений Жирков хаартыскалара, VII кылаас