Вася Другин, X кылаас, И.Н. Слепцов аатынан Кустуур орто оскуолата, Эбээн-Бытантай улууһа:
– Бу сэһэни фронтовик суруйааччы Тимофей Сметанин суруйан хаалларбыт. Киинэни көрө олороммун, ама, бу сахалар устубуттара дуо диэн сөхпүтүм. Олус элбэх үлэ барбыта көстөр. Ньиэмэстэр, окуопалар, дэлби тэптэриилэр дьиҥнээх курдуктар. Бу киинэни ордук уолаттар көрөллөрө наадалаах дии саныыбын. Олоҕу көрүүлэрэ, олоххо сыһыаннара уларыйыа этэ. Оҕолор омук киинэлэрин, араас аралдьытар биэриини көрөн үтүктэллэр. Онуоха бу киинэ сүрүн геройа олус үчүгэй холобур. Киинэттэн элбэҕи билэҕин, үгүскэ үөрэнэҕин. Киинэ ис хоһооно хас биирдии киһи герой буолуон сөп,онуоха туох эрэ ураты дьоҕурдаах төрүүр наадата суох. Уустук кэмҥэ хорсун санаа уонна булугас өйү туттуннахха кыайыылаах тахсыахха сөбүн киинэ кэпсиир.
Наум Наумов, IX кылаас, И.Н. Слепцов аатынан Кустуур орто оскуолата, Эбээн-Бытантай улууһа:
– Мин сэрии туһунан элбэх киинэни көрбүтүм. Бу киинэ үчүгэй, ити киинэ куһаҕан диэн араарар кыаҕым суох. Арай бастыҥтан бастыҥ киинэни эт диэхтэхтэринэ толкуйдуу барбакка «Рядовой Чээрин» диэм этэ. Бу киинэни үгүс дьон көрбүт буолуохтаах. Киинэ сүрүн геройа саха салдаата, снайпер уол – Егор Чээрин. Хорсун санаалаах уол билиэҥҥэ да түбэстэр, тыыннаах хаалар, дойдутун туһугар туруулаһар дьиҥнээх патриот. Кини киинэ устун биир чугас өйөбүл буолар доҕордоох. Егор Чээрин хас даҕаны табаарыһын өлөр суолтан быыһаан дьиҥ кырдьыктыы хайҕабыл ылар чиэстээх.
Ханнык баҕарар сэрии туһунан киинэ бастатан туран киһиэхэ дойдуга тапталы, патриот буоларга иитэр-такайар. «Егор Чээрин» киинэҕэ эмиэ дойдуга таптал, дьиҥнээх доҕордоһуу, киһи дьылҕата көстөр. Хас даҕаны киһи тыына быстарын, хаана тохторун көрөн киһи хараҕын уутун сатаан туппат да түгэннэрдээх буолар. Бу кэниттэн кыра оҕо эрдэххиттэн сэрии – куһаҕан, сэрии – алдьархай, сэрии суох буоллун диэн өйдөбүл киирэр. Туругурдун эйэлээх халлаан!