Алтынньы ый 1-4 күннэригэр Горнай улууһун Сэмэн Данилов аатынан Бэрдьигэстээх орто оскуолатыгар Учуутал күнүгэр анаммыт араас хабааннаах тэрээһиннэр ыытылыннылар. Быйыл саҥа ананан үлэлии кэлбит эдэр педагог Николай Григорьевич Иванов «Түмэн» оҕо хамсааһынын кытары үрдүк таһымҥа учууталларга аралдьытар умнуллубат күннэри бэлэх ууннулар. Ол курдук, сэрэдэ күн оҕолор икки хамаанда туруораннар, учууталлары кытары волейбол күрэҕэр күөн көрүстүлэр. Күрэх түмүгэр доҕордоһуу кыайбыта.
Иккис күҥҥэ оҕолор учууталларга квест-оонньуу тэрийэн бэлэмнээбиттэр. Манна учууталларбыт бэйэлэрэ оҕо буоланнар, араас таабырыннары таайдылар, айар үлэлэри оҥордулар, сорудахтары толордулар.
Бээтинсэ күн «Түмэннэр» 12-с кылаас буолбут учууталларын үөрэттилэр. Математика, саха тыла, физкултуура, нуучча тыла уонна муусука уруоктарыгар бэйэлэрин билиилэрин тургутан көрдүлэр. Уруок кэмигэр үөрэнээччи оруолун толороммут, «4»-«5» сыаналары ыламмыт үөрүүбүт муҥура суох. Ол эрэн, оҕолорбут учууталлар сөбүлээн туттар тылларын, холобура, “Тоҕо хойуутаатыҥ?”, “формаҕын тоҕо умуннуҥ?”, “уруок кэмигэр кэпсэтимэҥ эрэ!”, онтон да атын, бэйэбитигэр утары эппиттэрэ — саамай көрүдьүөс түгэнинэн буолла.
Бу күн оскуолабыт бары үөрэнээччилэрэ убаастыыр, ытыктыыр учууталларыгар махтанан туран ылбаҕай ырыалардаах, эрчимнээх үҥкүүлэрдээх, эҕэрдэ тыллардаах кэнсиэр көрдөрдүлэр. Оҕолорбут долгуйан туран бэлэмнэммиттэрэ, кыһаллыбыттара киһи сүргэтин-санаатын көтөҕөр.
Уонна бүтэһик күҥҥэ тапталлаах үөрэнээччилэрбит биһиэхэ сынньалаҥ күнү бэлэхтээтилэр – бэйэни салайыныы күнэ буолла. Ол курдук, үрдүкү кылаас үөрэнээччилэрэ кыра кылаастары үөрэттилэр. Учууталлар биэрбит сорудахтарын толоттордулар, илэ бэйэлэринэн учуутал уустук идэтин боруобалаан көрдүлэр. Бу күн туһунан учууталлаабыт оҕолортон уонна үөрэнээччилэртэн санааларын ыйыттым:
Сабина Сивцева (оскуола дириэктэрэ буолбута): “Мин санаабар, бэйэни салайыныы күнэ олус үчүгэйдик ааста. Үчүгэйэ диэн «учууталлар» бэйэлэрин үлэлэрин олус учугэйдик ыыттылар, уустуга диэн истибэт оҕолору кытта үлэлэһэргэ эбит”.
Эдита Антонова: “Мин бүгүн дириэктэри үөрэх чааһыгар солбуйааччы буоллум. Бэйэни салайыныы күнүн олус өр кэтэспиппит уонна олус үчүгэйдик ааста диэн сыаналыыбын. Үчүгэйэ диэн бэйэбин завуч курдук холонон көрдүм уонна туох ыарахаттардааҕын биллим. Саамай ыарахана диэн расписание оҥорорбор этэ».
Алина Павлова (омук тылыгар үөрэппитэ): «День самоуправления прошел увлекательно и полезно, ученики получили больше опыта, а учителя смогли отдохнуть от работы. В день самоуправления было хорошо ощутить себя на месте учителя и проявить лидерские качества, но порой сложно было брать на себя ответственность и управлять классом. Я думаю, что эта профессия сложная, потому что педагог должен обладать широким спектром качеств, такими как: ответственность, терпение, умение работать с детьми, а также лидерские качества».
Алекса Семенова (омук тылыгар үөрэппитэ): «Бэйэни салайыныы күнэ үчүгэйдик ааста дии саныыбын. Үчүгэйэ диэн учууталлыырбын сөбүлээтим, ыарахана диэн кабинет буккуллуута эҥин баар этэ. Учуутал идэтэ ыарахан баҕайы эбит».
Константин Капитонов (омук тылыгар үөрэппитэ): «Үчүгэйдик ааста, маннык күнү тэрийэргэ оҕолор, учууталлар, дьаһалта олус кыһаллыбыттар дии санаатым. Оҕолору үөрэтэрбэр ыарахаттары көрүспэтим. Оҕолор бары бэрээдэктээхтик үөрэннилэр, биир эмит сорудаҕы өйдөөбөтөх буоллахтарына, быһааран биэрбиппит».
Тимур Мордискин (физиканы үөрэппитэ): «Бэйэни салайыныы күнэ дьиктитик ааста. Оҕолору үөрэтэммин, учууталга төһө ыараханын өйдөөтүм. Учуутал идэтэ ыарахан баҕайы эбит».
Кирилл Иванов, 9-с кылаас үөрэнээччитэ, оҕолор үөрэппиттэрин туһунан санаата: «Бэйэни салайыныы күнэ олус үчүгэйдик ааста. Үчүгэйэ диэн оҕолор үөрэттилэр. Кыра кылаастары үрдүкү кылаас оҕолоро үөрэтэллэрэ ордук. Оттон тохсустары тохсус кылаастар үөрэтэллэрэ хайдах эрэ сыыһа дии санаатым. Ол эрэн учуутал идэтэ, мин санаабар, ыарахан соҕус, аҕыйах бириэмэ иһигэр сорудахтарын түҥэтэлииргэ, бэрэбиэркэлииргэ олус элбэх бириэмэ барар уонна сорох ардыгар бириэмэ тиийбэт буолар. Бу күн олус үчүгэйдик ааста!».
Чахчы даҕаны, биһиги, учууталлар, олус дьоллоох дьоммут. Тапталлаах үөрэнээччилэрбит кыһаллан туран, биһиги сынньанарбыт, түбүктээх үлэттэн аралдьыйан ыларбыт туһугар кыһаллыбыттар. Махталбыт муҥура суох!
Сиһилии видео-матырыйаалга көрүҥ:
Суруйда Виктория Петровна Колодезникова, С.П. Данилов аатынан Бэрдьигэстээх орто оскуолатын омук тылын учуутала, дириэктэри иитэр үлэҕэ сүбэһит, «Сайдам» медиакиин салайааччыта, Горнай