Оскуолабытыгар Ийэ тыл, сурук-бичик күнүн чэрчитинэн саха тылын уонна литературатын нэдиэлэтигэр саха норуодунай суруйааччыта Василий Семенович Яковлев-Далан төрөөбүтэ 95 сылыгар аналлаах нэдиэлэ буолан ааста. Бастаан учууталларбыт нэдиэлэ устата ханнык тэрээһиннэр буолалларын билиһиннэрдилэр.
Орто сүһүөх үөрэнээччилэргэ «Хартыынанан кэпсээн» күрэх буолла. Онно 1 миэстэни Константинов Вася, Афанасьева Даниил, 2 миэстэ Шестакова Айураана, Максимов Рассел, 3 миэстэни Николаева Амелия, Мохордонова Ксюша ыллылар.
«Айымньыны ааҕыыга көҕүлээ» диэн реклама күрэҕэр оҕолор бэйэлэрэ сөбүлээн аахпыт айымньыларын сырдаттылар. 1 миэстэ Х кылаас буолла, 2 миэстэ – VIII кылаас, 3 миэстэ – VII кылаас.
«Сэркээн сэһэнньит» диэн күрэх уолаттары түмтэ. Кинилэр булка хайдах сылдьыбыттарын, сиэр-туом туһунан кэпсээтилэр. Тугу билэллэрин туһунан санааларын үллэһиннилэр. Онтон лексика олимпиадата ыытылынна. Ааҕыы күрэҕэ оҕо суруйаачччыта Анна Неустроева «Тиргэһиттэр» кэпсээнин тула барда. Оҕолор ааҕар, кэпсиир дьоҕурдарын көрдөрдүлэр.
Нэдиэлэ тэрээһиннэригэр бары көхтөөхтүк кыттынныбыт. Ордук реклама күрэҕин сэргээтибит. Доҕотторбут умсугуйан аахпыт айымньыларын биһиги эмиэ ааҕыахпытын баҕардыбыт.
Вероника АФАНАСЬЕВА, Х кылаас,
Е.Е. Пахомов аатынан Болугур орто оскуолата, Амма.