А.Г. уонна Н.К. Чирээйэптэр ааттарынан Дьокуускай куорат национальнай гимназиятын III «А» кылааһын үөрэнээччилэрэ Норуоттар икки ардыларынааҕы фестиваль-күрэххэ кытта Казахстаҥҥа сырыттыбыт. Айаммыт Астана куораттан саҕаламмыта. Бу улахан, кыраһыабай, национальнай колориттаах, олус интэриэһинэй куорат.
Кэлбит күммүтүгэр «AILAND» океанариумҥа барбыппыт. Бу манна киэҥ өстүөкүлэ байҕалга акулалары, улахан балыктары, умайар уоттаах медузалары уонна араас муора кыылларын дьиктиргии, сөҕө-махтайа көрдүм. Өстүөкүлэ туннель иһинэн аастахха, киэҥ байҕал анныгар сылдьар курдук сананаҕын, төбөҥ үрдүнэн акулалар, муора чарапаахылара, онтон да атын дьикти моһуоннаах муора кыыллара устан ааһаллар. Өстүөкүлэ туннели көрө турдахпына, арай утары улахан акула устан кэлбитигэр, ону көрөн олус диэн соһуйбутум, куттаммытым. Араас дьикти быһыылаах аквариумнарга скат, о.д.а. араас балыктары, муора сулустарын, муора аттарын, крабтар олохторун сэргээн көрөҕүн. Бу океанариумҥа сылдьан, муора олохтоохторун туһунан элбэҕи, интэриэһинэйи биллим-көрдүм.
Казахстан баай култууралаах, интэриэһинэй да айылҕалаах дойду эбит. Бу айаҥҥа сылдьан олус элбэҕи, саҥаны биллим. Фестивальга ырыа ыллаан, үҥкүүлээн, «Кылаан чыпчаал» үрдүк аатын ылбыппытыттан олус үөрдүм.
Чэмэлиинэ Попова,
А.Г. уонна Н.К. Чирээйэптэр ааттарынан
Дьокуускай куорат национальнай гимназиятын
III «А» кылааһын үөрэнээччитэ