Биир дойдулаахпыт, «Эр санааланыы» уордьан кавалера Николай Романов 2023 сыл балаҕан ыйын 10 күнүгэр хорсуннук дойдутун көмүскүү сылдьан сырдык тыына быстыбыта.
Аҕа дойдуну көмүскээччилэр күннэригэр анаан Петр Митрофанович Васильев аатынан Соловьев орто оскуолатыгар анал байыаннай дьайыыга олоҕун толук уурбут киһибитин үрдүктүк чиэстээтибит.
Николай Николаевич Романов бастакы идэтинэн географ буолан, герой паартата география кэбиниэтигэр турда. Бочуоттаах миэстэҕэ оскуола бастыҥ үөрэнээччитэ Ангелина Кривошапкина тигистэ.
Чугас дьоно, үөрэппит учууталлара этэллэринэн, Николай Николаевич бары предмеккэ дьоҕурдааҕа. Сүрүннээн математика, география предметтарыгар ордук чорбойоро уонна олус үчүгэйдик хоһоон ааҕара. Онон сибээстээн чугас дьоно кини аатынан оҕолорго метаолимпиада ыыттылар. VII-XI кылаас оҕолоро буоламмыт математика, география, поэзия сорудахтарынан күрэхтэстибит. Кыайыылаах аатын мин, VIII кылаас үөрэнээччитэ, ылары ситистим.
Метаолимпиада аан бастакытын ыытылынна. Мин санаабар, аан маҥнай буолар күрэххэ бастакы миэстэ буолар олус диэн эппиэтинэстээх. Николай Николаевич Романов чугас дьонун ааттарыттан үтүө тыллары истэн, кэрэ көстүүлээх кубогынан, харчынан бириэмийэнэн наҕараадаланан олус үөрдүм. Күрэх таһыма сылтан-сыл өссө үрдүө диэн чугас дьоно баҕа санааларынан үллэһиннилэр.
Бу күн Николай Романов кэргэнэ Нюргуяна Романова, бииргэ төрөөбүттэрэ байыаска анаммыт анал истиэндэни арыйдылар. Сенсорнай экраҥҥа саллаат олоҕо толору киирбит.
Николай Николаевич хорсун санаатынан, мындыр өйүнэн холобур буолар. Кини биһиги эйэлээх олохпут туһугар киирсэн, күн сириттэн туораабыта үйэлэргэ умнуллуо суоҕа!
Маша СОБАКИНА, VIII кылаас,
П.М. Васильев аатынан Соловьев орто оскуолата, Чурапчы