Олунньу 8 күнэ Арассыыйаҕа Наука күнэ бэлиэтэнэринэн уhуйаан уонна оскуола алын кылаас оҕолоругар «Наука эйгэтигэр» диэн анал тэрээhин буолла. 1 — 4 кылаастарга наука биллиилээх учуонайдарын кытта билсиhии, наукалар араастарыгар таайбараҥ буолла.
Бастакы кылаас учуутала Жиркова Ирина Николаевна сымыытынан уопут кѳрдѳрдѳ. Оскуола библиотекатын үлэhитэ Платонова Саргылана Семеновна оҕолорго Саха сирин каартатынан улуустары, кииннэрин буларга оонньотто. Оҕолор хамаандаҕа арахсан, учууталлара бэлэмнээбит квест оонньууга түѳрт станциянан куоталастылар: математика, биология наукаларын сорудахтара, уруhуйунан таайыы, геометрическай фигуралар, булугас ѳйгѳ практическай сорудахтар, толкуйдатар оонньуулар. Кыайыылаах хамаандалар минньигэс кэмпиэттэри туттулар.
Алын кылаас учууталлара Жиркова И.Н., Шамаева А.Н., Оленова С.Д., Тарасова Л.С. уһуйаан бары оҕолоругар уопут арааhын кѳрдѳрѳн кэпсээтилэр, оҥордулар: истээх уонна кураанах сымыыттары ууга уган тэҥнээтилэр; кумааҕы сибэккилэри кумуччу туппуттарын ууга ууран тылыннардылар; кумааҕыттан пропел оҥорон кѳтүттүлэр; хаары бэйэтин уонна ууллубут хаары тѳһѳ ырааһын, кирдээҕин тэҥнээтилэр; иhиттэн ууну чүмэчи кѳмѳтүнэн ыстакаҥҥа оботторуу; мандарин хаҕынан үрүллүбүт салгын саарын тэhии. Оҕолор кэчигирэhэн олорон олус сѳхтүлэр, интэриэhиргээтилэр, үѳрдүлэр, астыннылар, уопут оҥорсон кыттыстылар. Оҕолор киэhэ дьиэлэригэр тиийэн учууталлар кѳрдѳрбүт уопуттарын тѳрѳппүттэригэр кэпсээн, тугу ѳйдѳѳбүттэрин оҥорон чиҥэппиттэр.
Бу күн оскуола иннинээҕи саастаах уонна алын кылаас оҕолоро наука эйгэтигэр умсугуйан дьарыктаннылар, элбэҕи биллилэр, кѳрдүлэр.
Людмила Тарасова , М.А. Алексеев аатынан Баппаҕаайы оскуолатын учуутала
Наука күнүн уһуйааммыт оҕолоро бэрт интэриэhинэйдик бэлиэтээтилэр. Аан дойдуга биллэр учуонайдар тустарынан кэпсэтии буолла, учуонай диэн кимин биллилэр, тугу дьарыктанарын кѳрдүлэр. Ону таhынан оҕолор учуонай буола оонньоотулар, элбэх уопут оҥордулар. Кырачааннар уунан, мыыланан, термометр арааһын үѳрэттилэр, кыраадыстаан чинчийдилэр, сүрэх тоҕо түргэнник тэбэрин быhаардылар. Эбии үѳрэхтээhин педагога Степанова Екатерина Васильевна үс сүрүн ѳҥтѳн сэттэ кустук ѳҥүн таһааран сѳхтѳрдѳ. Бу күн оҕолор наука араас хайысханы: эти-сиини, техниканы, айылҕа кѳстүүлэрин уонна да атын хайысхалары үѳрэтэрин биллилэр, бэйэлэрэ уопут оҥорон олус сэргээтилэр.
Элеонора Николаева, М.А. Алексеев аатынан
Баппаҕаайы оскуолатын уһуйаанын иитээччитэ,
Илбэҥэ, Бүлүү