Төрөөбүт дойду диэн киһи биир саамай уоскуйууну, дьиҥнээх иэйиини ылар сирэ. Хас биирдии киһи, көтөр-сүүрэр бары төрөөбүт дойдутун уратытык, атын дойдуттан чорботон көрөр идэлээх. Күн сирин көрбүт, улааппыт, олохпутун булбут сирбитин, өбүгэбит дойдутун харыстыыр, араҥаччылыыр биһиги эбээһинэспит. Мин Саха сирин биир саамай кэрэ дойдутугар, ырыаҕа ылланар, хоһооҥҥо хоһуллар кыыс Амма устар сиригэр Амма нэһилиэгэр олоробун. Манна олорорбунан, биһикпин ыйаабыппынан мин киэн туттабын. Дойдубар баар бэлиэ сирдэри сырдатыахпын баҕарабын.
Амма дойдута кэрэ, ытык сирдэринэн аатырар. Айылҕа оҥорбут уратылара дьон сүрэҕин сүүйэр ураты алыптаах. Амма нэһилиэгин иһигэр элбэх араас сынньанар сир баар. Сирдьит буолан ыалдьыттары бу курдук сирдэргэ сырытыннарыам этэ.
Бастатан туран, Аммабыт өрүһүгэр анаммыт монумены сырдатыам этэ. 2011 сыллаахха балаҕан ыйын 10 күнүгэр, улууспут 100 сыллаах өрөгөйдөөх бэлиэ күнүн чэрчитинэн Амма өрүс кытылыгар «Кыыс Амма» диэн сүрэхтээн арыйбыттара. Кини илдьэ сылдьар суолтата төрөөбүт дойдуга таптал, кэрэ, сырдык, ыраас, нарын-намчы өрүс кутун илдьэ сылдьар.
Иккиһинэн, биллиилээх тустуук, улуу тренер Д.П. Коркин иитиллээччитэ, эдэр сааһыгар быстах быһылаантан күн сириттэн күрэммит, саха омугар сырдык өйдөбүл буолан хаалбыт Н.С.Захаров – Сахаачча пааматынньыга, успуорт кыһатын иннигэр турар. Бу пааматынньык суолтата, успуорт эйгэтигэр угуйуу, кыайыы, олоххо дьулуһуу, дьаныар, тулуур. Маны таһынан успуорка анаммыт Скрябин искибиэрэ баар. Элбэх ситиһиилээх, биллиилээх тустуук, үтүөлээх тренер, уһуйааччы Михаил Скрябин сырдык кэриэһигэр анаммыта. Амма дойдутуттан элбэх биллиилээх ыспарсыаннар бааллар. Кинилэр ситиһиилээх буолалларыгар тренердэр олус улахан оруоллаахтар. Биир дойдулаахтарбыт ааттарын үйэтитэн маннык оҥороллоро олус кэрэхсэбиллээх.
Маны таһынан оҕо саас тэбэр сүрэҕэ буолбут мини-парк «Строитель» 2023 сыллаахха оҥоһуллан киирбитэ. Манна оҕолорго анаан араас элбэх хаачыал, олорор сир, самокат, эти-сиини эрчийэр турниктар бааллар. Бу кыра пааркаҕа оҕолор саас, сайын, күһүн олус сөбүлээн сылдьаллар. Иллэҥ кэмнэригэр куруук онно баран бирэмэлэрин атаараллар.
Кылгастык сырдаттахха бу курдук. Аммабыт иһигэр биллэн турар киһи сылдьыан сирэ элбэх. Мин аҕыйаҕын эрэ сырдаттым. Дойдубут күннэтэ сайдан иһэриттэн олус үөрэбин, киэн туттабын. Кыра эрдэхпиттэн көрөн улааппыт дойдум күнтэн-күн өссө кэрэтийэн, сырдаан, дууһабар, сүрэхпэр сылаас буолан иһэр. Маннык кэрэ, үтүө дойдуга төрөөбүппүнэн, улааппыппынан бэйэбин дьоллооҕунан ааҕынабын. «Аммаҕа төрүүллэр дьоллоохтор» диэн Н.К. Рязанская эппит бэргэн этиитэ чахчы буоларын бигэргэтэбин. Төрөөбүт дойдугутун таптааҥ, харыстааҥ.
Арина ЗАБОРОВСКАЯ, XI кылаас үөрэнээччитэ
«АЛиК» медиа-киин
Л.В. Киренскэй аатынан Амматааҕы лиссиэй
keskil14.ru