Хаҥалас улууһун П.И. Шадрин аатынан Өктөм орто оскуолатын үөрэнээччилэрэ Саха Өрөспүүбүлүкэтин Бастакы Президенэ Михаил Ефимович Николаев туһунан суруйуулара
Михаил Ефимович Николаев Хаҥалас улууһун Өктөмүгэр Чапаай нэһилиэгэр төрөөбүтэ. Кини мин үөрэнэр Өктөмүм оскуолатыгар, улуус бастакы оскуолатыгар, үөрэммит киэн туттар киһибит буолар.
Мин М.Е. Николаев туһунан өссө кыра эрдэхпинэ истибитим. Кыра кылаастарга үөрэнэ сылдьан Чапаайга баар «Николаев» кииҥҥэ Билим Дьоҕус Академиятын саҥа дьиэтигэр экскурсияҕа сылдьыбытым. Бу баараҕай дьиэҕэ оҕо сайдарыгар туох барыта баарын көрөммүн онно үөрэниэхпин наһаа баҕарбытым.
Михаил Ефимович өрөспүүбүлүкэ сайдыытыгар элбэх үлэни, улахан кылааты хаалларбыт киһи буолар. Оҕолорго спорт бырааһынньыгын кини тэрийбитэ. Ол курдук 1996 сыллаахха Саха сиригэр аан бастаан «Азия оҕолоро» Норуоттар икки ардыларынааҕы спортивнай оонньуулар ыытыллыбыттара.
Мин дьиэ кэргэммэр бары бастакы Президеммитин ытыктыыбыт, кининэн киэн туттабыт. Мин саныахпар, Михаил Ефимович Николаев курдук киһи үйэҕэ биирдэ төрөөн ааһар.
ДаринаАНДРЕЕВА, VIII «А» кылаас
***
Михаил Ефимович төрөөбүт норуотугар сырдык, үтүө өйдөбүлү хаалларбыт салайааччы. Ордук кэнчээри ыччат сайдарыгар элбэх тэрээһиннэри төрүттээбитэ. Холобур, «Азия оҕолоро» Норуоттар икки ардыларынааҕы спортивнай оонньуулар. Оҕолор бары өттүнэн эргиччи сайдалларыгар анаан төрөөбүт сиригэр Билим Дьоҕус Академиятын туттарбыта. Билигин манна өрөспүүбүлүкэ араас муннуктарыттан оҕолор кэлэн үөрэнэллэр, сайдаллар.
Айсен ДИОДОРОВ, VIII «А» кылаас
***
Мин М.Е. Николаевынан, саха Бастакы Президенинэн, киэн туттабын. Кини Саха сирин дьонун олохторо тупсарын туһугар элбэҕи үлэлээбитэ, өрөспүүбүлүкэни сайыннарбыта. Саха норуота сайдыылаах буолуоҕун, саха дьоно төрөөбүт дойдуларын таптыыр, дойдуларын туһугар үлэлиир-хамсыыр буолуохтарын баҕарара.
Сандаара АБРАМОВА, VIII «А» кылаас
***
Саха бастакы Президенэ Чапаайга үөрэммит оскуолата, кини аатынан Николаев киин-архыып бибилэтиэкэ баар. Михаил Ефимович үлэлиир кабинета билигин устуоруйа кэрэһитэ буолан турар. Архыып-бибилэтиэкэ түмэлигэр Михаил Ефимовичка тус бэйэтигэр туттарыллыбыт өйдөбүнньүк бэлэхтэр хараллан тураллар.
Карина БАТЮШКИНА, VIII «А» кылаас
***
Михаил Ефимович Николаев төрөөбүт дойдута, Саха сирэ, сайдарын туһугар элбэҕи оҥорбут улуу киһи. Дьокуускай куоракка урукку өттүгэр Саха сиригэр суох Муусука Үрдүкү оскуолатын, балет оскуолатын арыйтарбыта.
Хаһан эрэ кыра сылдьан Дьокуускай куоракка Михаил Ефимовиһы кытта илии тутуһан дорооболоспутум. Ол миэхэ үтүө өйдөбүл буолар. Мин санаабар, саха норуотугар кини төрөөн ааспытыттан элбэх киһи дьоллоох.
Богдан ИВАНОВ, VII «А» кылаас
***
Бастакы Президеммит Михил Ефимович Саха сирэ сайдарын туһугар элбэх үлэни оҥорбута. Төрөөбүт Өктөмө сайдарыгар эмиэ көмөлөспүтэ. Ол курдук, төрөөбүт сиригэр Чапаайга техническэй лицей (билигин Үөрэх билимин киинэ диэн ааттанар), Николаев архыып-бибилэтиэкэ, Билим Дьоҕус Академията тутуллубуттара, өссө Саха сиригэр соҕотох «Орто дойду» зоопарка арыллыбыта. Онон нэһилиэкпитигэр икки оскуола, тыа хаһаайыстыбатын университетын филиала баар.
Мин саха Бастакы Президенэ төрөөбүт сиригэр олорорбунан, үөрэммит оскуолатыгар үөрэнэрбинэн киэн туттабын.
Тимур СТРЕКАЛОВСКАЙ, VII «А» кылаас
***
Михаил Ефимович Өктөм оскуолатыттан Саха сирин Президенэ буола үүммүтэ. Дойду ыһыллыытын кэмигэр суверенитеты ылынан өрөспүүбүлүкэ сайдан барбыта. Норуот, ыччат сайыннын диэн элбэх тутуулар ыытыллыбыттара, араас оскуолалар, үрдүк үөрэх кыһалара арыллыбыттара. Ханнык баҕарар оскуолаҕа оҕону биэс хайысханан: спорт, саахымат, тыл, уруһуй, муусука өттүнэн сайыннарарга анаммыт «Пять китов образования» диэн бырагыраамма киирбитэ.
Арчын ХАДАН, VII «А» кылаас
***
Мин уһуйаантан саҕалаан дуобатынан дьарыктанабын. Дуобакка маастарга кандидат буолабын. Тириэньэрим Александр Соломонов кыра эрдэхпиттэн дьарыктыыр. Оҕолор саахыматынан, дуобатынан кыра эрдэхтэриттэн дьарыктаналларыгар улахан кылааты киллэрбит Бастакы Президеммитигэр Михаил Ефимович Николаевка наһаа махтанабын.
Дима НАУМОВ, VII «А» кылаас
***
Михаил Ефимович Николаев аата, үлэтэ умнуллубат. Тоҕо диэтэххэ, кини төрөөбүт норуота сайдарын туһугар улахан уларытыылары, саҥаны киллэрбит киһи буолар. Президенинэн талыллаат, 90-с сылларга суверенитеты киллэрбитэ. Төрөөбүт тылга, төрүт култуураҕа, тыа сирин олоҕо сайдарыгар элбэх үлэ ыытыллыбыта. Арай оччолорго маннык үлэ ыытыллыбатах, Михаил Ефимович президент буолбатах буоллун?! Оччоҕо билигин хайдах олоххо олоруохпут эбитэ биллибэт. Онон маннык сайдыылаах, сайдар кыахтаах олоххо олорорбутунан Киниэхэ бары махтаныах тустаахпыт.
Сайаана ИВАНОВА, VII «А» кылаас
***
Мин кинини хаһан да көрбөтөҕүм эрээри улахан өйдөөх Улахан киһи диэн сыаналыыбын. Кини баар буолан буолан Саха сирэ сайдыбыта, уустук кэмнэри туораабыта. Норуот доруобай, чөл туруктаах буоллаҕына сайдар кэскиллээх буолар. Ону өйдөөн улахан медицинэ киинин, тыа сиригэр таас балыыһалары, спорт дыбарыастарын, саалаларын туттарбыта.
Михаил Ефимович саха тыла сайдыытыгар эмиэ улахан кылааты киллэрбитэ. Саха тыла өрөспүүбүлүкэҕэ судаарыстыбаннай тыл буолбута.
Мин саха буолан тураммын, Михаил Ефимовичка олус махтанабын, кининэн киэн туттабын.
Сахаайа АНДРЕЕВА, VII «Б» кылаас
***
Мин М.Е. Николаев туһунан олох кыра эрдэхпиттэн билэбин. Кини көмөтүнэн Саха сирэ, олорор нэһилиэкпит сайдыбыта. Уһуйааҥҥа сылдьан биир улахан тэрээһиҥҥэ Өктөм кулуубугар киниэхэ хоһоон аахпытым. Ити миэхэ улахан чиэс, олохпор умнуллубат түгэн буолар.
Антонов Максим, VII «Б» кылаас