Мас тардыһыыта – саха омук төрүт оонньуутун биир көрүҥэ. 1990 сылтан бэттэх мас тардыһыыта дьон болҕомтотун тардар гына олус сайынна, тубуста. Ыһыылаах-хаһыылаах, көрүөхтэн эриэккэс, киһи кэтэһэр спордун көрүҥэ буолла.
Балаҕан ыйын 22-24 күннэригэр Мээндиги нэһилиэгэр бэһис төгүлүн ыытыллар спорт бэтэрээнэ, полиция майора Владимир Александрович Никитин бирииһигэр аһаҕас өрөспүүбүлүкэтээҕи биирдиилээн уонна хамаанданан мас тардыһыытын күрэҕэ ыытылынна. Күрэхтэһиигэ барыта 16 хамаанда кыттыыны ылла. Өрөспүүбүлүкэ таһымнаах күрэхтэһиини бэһис сылын П.И.Караканов аатынан Мээндиги орто оскуолата иилээн-саҕалаан ыытта. Сүрүннүүр тренер Семен Семенович Попов.
Күрэхпит кылаабынай судьуйата Саха Өрөспүүбүлүкэтин 1 категориялаах судьуйата – Юрий Асинович Ефремов, сүрүн сэкирэтээрэ мас тардыhыытыгар өрөспүүбүлүкэ хас да төгүллээх чемпиона – Андрей Николаевич Винокуров.
Мэҥэ-Хаҥалас (Майа, Төҥүлү, Тумул), Чурапчы (Чурапчы, Арыылаах, Хадаар, Дириҥ, Сылан), Таатта (Ытык-Күөл), Дьокуускай куорат (Оҕо спортивнай оскуолата, Хатас), Хаҥалас, Амма (Сахаачча аатынан Амма оҕо спортивнай оскуолата, Чапчылҕан, Покровка, Сэргэ-Бэс, Сулҕаччы, Мээндиги) оскуолаларыттан кэлэн кытыннылар.
Бу күрэхтэһиигэ Аан дойдуга мас тардыһыыга тэҥнээхтэрин булбатах, Узбекистаҥҥа ыытыллыбыт мас тардыһыытыгар Аан дойду чемпионатын кыайыылаахтара: Анатолий Баишев, Егор Баишев, Татьяна Баишева, Дмитрий Неустроев, Айтал Антонов кэлэн ыалдьыттаан, кыттан, тэрээһин таһымын өссө үрдэттилэр.
Эмилия ДАВЫДОВА, IX кылаас,
П.И.Караканов аатынан Мээндиги орто оскуолатын медиа-киинэ,
Амма