Олунньу 14 күнүгэр «Кыайыы уота» оройуоннааҕы патриотическай аахсыйа ыаллыы сытар Малдьаҕар нэһилиэгиттэн Мэҥэдьэккэ кэллэ. «Кыайыы уота» Ньурба улууһун эдэр ыччаттарын көҕүлээһиннэринэн атырдьах ыйын 28 күнүгэр Дьокуускай куорат болуоссатын мэҥэ уотуттан саҕыллан Ньурбаҕа кэлбитэ. Малдьаҕар баһылыга Степанов Александр Александрович Мэҥэдьэк баһылыгар Николаев Леонид Александровичка кыайыы уотун туттарда.
«Кыайыы уота» икки нэдиэлэ устата Мэҥэдьэк нэһилиэгэр тэрилтэлэринэн ыалдьыттыыр. 11 кылаас үөрэнээччилэрэ «Билии аартыга» диэн музейдарын матырыйаалын оскуола тэриллиититтэн саҕалаан, сүдү кылаатын киллэрбит, сэрии кэмигэр директордаабыт, кэлин Степан Васильев колхоһу салайбыт Н.И.Прокопьевы, буойун учууталларын, анал байыаннай дьайыыга сылдьар выпускниктарын, Чечен сэриитин кыттыылаахтарын, Сергеевтэр учуутал династияларын, араас хайысхалаах: «Эрчим», «Дьиэ кэргэн биригээдэлэрин», «Кэнчээрилээх», «Үнүгэс», «Хоһуун» сайыҥҥы сынньалаҥ лааҕырдарын киэн туттан кэпсээтилэр.
Айтал Сидоров,
X кылаас,
Хатыы орто оскуолата,
Ньурба