Олунньу 14 күнүгэр Мэҥэ Хаҥалас улууһун Майа нэһилиэгэр Саха өрөспүүбүлүкэтин судаарыстыбаннай былааһын ситэриилээх уорганнарын 2024 сыллаах үлэлэрин отчуота буолан ааста. Отчуоттуур бөлөх салайааччыта СӨ экономикаҕа миниистирэ Петр Иванович Попов. Ону тэҥэ, доруобуйа харыстабылын миниистирин солбуйааччыта Надежда Тимофеевна Федорова, тыа хаһаайыстыбатын миниистирин солбуйааччыта Николай Степанович Афанасьев, сыана политикатыгар судаарыстыбаннай кэмитиэт бэрэссэдээтэлэ Николай Владимирович Бочков хамыыһыйаҕа бааллара.
Отчуот ааспыт сыллааҕы үлэ түмүктэрин сырдатар тэттик киинэттэн саҕаланна. Онтон олохтоохтор ыйытыыларыгар уонна этиилэригэр киирдилэр. Ол курдук, олохтоох Татьяна Артемьева маннык ыйытыылары уонна баҕа санаалары эттэ:
Дакылааты чаҕылхай, барыта чопчу чуолкай диэн бэлиэтиэхпин баҕарабын. Мин ыйытыым маннык: уолум СВО-тан кэллэ, СВО байыастарыгар хаһан сир биэрэҕитий? Тыа хаһаайыстыбатыгар грант хаһан бэриллэрий? Былырыыҥҥы бырабыытылыстыба отчуотугар киирбит этиилэр төһө туоллулар, ол отчуокка киирбэтэ дуо? Тоҕо төрөөччүлэри барыларын куоракка илдьэн төрөтөллөрүй? Майаҕа роддом баар, тоҕо манна төрөппөттөрүй? Улуус, нэһилиэк историятын үөрэтэр төрүт култуура предметтэрин курдук оскуолаҕа тоҕо киллэрбэппитий? Учебниктары сахалыы тоҕо таһаарбаттарый? Ити хаһан көнөрүй?
Олохтоох Кузьма Бурнашев эмиэ бэйэтин этиилэрин, сайдыыга сирдиир көрүүлэрин кытта үллэһиннэ:
Тыа хаһаайыстыбатыгар эдэр ыччаты хайдах тардар туһунан толкуйдуубут. Сойуус саҕана ыанньыксыттары пенсияҕа таһаарар этилэр, ону үөрэтэн киллэриэххэ баар этэ. Майаларга, биһиэхэ, академикпыт В.П. Ларионов аатын сүгэр уулусса алдьана турар, асфальт оҥоһулларыгар үп көрүллэрэ эбитэ буоллар. Саха республикатыгар 3000 киһи сахарнай диабеттаах учуокка турар. Ыарыһахтар корпустарыгар хаалаллара буоллар. Майа спортивнай объектарыгар саҥардыы наада. Паромунан туоратааччылар тоҕо биирдиилээн киһиттэн төлөбүр ылар буоллуларый? Охлопков аатынан Майа орто оскуолатын суолугар светофор дуу, айан түргэнин бэрэбиэркэлиир камера дуу турара буоллар. Бадаайы түөлбэ олохтоохторо уоппут баран эрэйи көрөбүт, газ умуллан дьиэ тымныйар.
Майабыт тупсан иһэр, элбэх хаарбах дьиэттэн квартираларга көстүлэр. Онно олус махтанабыт.
Өрөспүүбүлүкэбит, улууспут, нэһилиэкпит сыл аайы сайдан иһэр — инникитин да сайда турдун!
Сандаара Тихонова,
В.П. Ларионов аатынан Майа орто оскуолатын 10б кылааһын үөрэнээччитэ