Сотору Ньукуолун күнэ. Саха итэҕэлинэн, сайын саҕаланар, күөххэ үктэнэбит. Баччаларга саха киһитэ кыстыгы хайдах туораабытын туһунан анааран, ырытан көрөр.
Ол сиэринэн, бу күннэргэ нэһилиэкпит баһылыгын Тарас Лукич Тарасовы кытта быйылгы кыстык хайдах ааспытын туһунан кэпсэттим.
– Үтүө күнүнэн, Тарас Лукич! Быйыл биһиги нэһилиэкпит кыстыгы хайдах туораата?
– Ааспыт сыллары кытта тэҥнээтэххэ, этэҥҥэ ааста диэн түмүктүөххэ сөп. Урукку сылларга, холобур, 2021, 2022 сылларга отпут-маспыт тиийбэккэ эрэйи көрбүппүт диэххэ сөп. Быйыл отпут өлгөмнүк үүнэн, атын алаастарынан көһө сылдьан оттообокко, бааһынай уонна чааһынай хаһаайыстыбаларбыт окко тиксэн кыстыгы этэҥҥэ туораатылар. Нэһилиэкпит үрдүнэн 721 сүөһүлээхпит, 506 сылгылаахпыт. Төһө да сүөһүбүт, сылгыбыт аҕыйаҕа суох буоллар, оппут сүрдээҕин дэлэйдик эппиэттээтэ диэн этиэххэ сөп.
– Нэһилиэкпитигэр күөх төлөн уотугар холбоно илик ыаллар бааллар дуо? Кинилэр маһынан хааччыллыылара хайдаҕый?
– Сүрдээх интэриэһинэй боппуруоһу биэрдиҥ. Кэнники сылга Бырабыыталыстыба уурааҕынан хас биирдии дьиэ күөх төлөҥҥө холбонуохтаах диэн уураах тахсыбыта. Онон оһоҕунан оттуллар, отоплениенан сылыйар дьиэлэр үксүлэрэ күөх төлөн уотугар холбоммуттара. Онон мас кыстааһыныгар улахан кыһалҕа суох. Арай баанньык, гараж оттооһунугар эрэ оҥоһуллар . Бу биһиги атын нэһилиэктэртэн улахан уратыбыт буолар.
Сайылыы кэлэр дьоммутугар дьиэлэрэ оһоҕунан оттуллар. Кинилэргэ күһүн, саас оскуола уолаттарын тимуровскай хамсааһыннара көмөлөһөллөр. Кыстыгы этэҥҥэ туорааһын нэһилиэкпит тупсан, сайдан иһэрин көрдөрөр.
– Тарас Лукич, кэпсээҥҥит иһин махтал!
Вадим КОЛЕСОВ, Х кылаас,
А.П. Илларионов аатынан Хайахсыт орто оскуолата, Чурапчы