Алтынньы 29 күнүгэр Комсомол тэриллибитэ 105 сылын туолла. Бу бэлиэ күнү кѳрсѳ биhиги оскуолабытыгар тэрээhин ыытылынна. Бу үѳрүүлээх линейкаҕа оскуолабыт В.Е.Колмогоров аатынан пионерскай дружинатын пионердарыгар, 1-4 кылаастар «Орлята России» тэрилтэҕэ киирбит оҕолорго дойдубут историятыгар биир сүдү миэстэни ылар ыччат сойууhа – Комсомол хаhан уонна хайдах тэриллибитин туhунан иитэр үлэҕэ дириэктэри солбуйааччы М.А. Яковлева сиhилии кэпсээтэ. Сэбиэскэй былааhы туруулаhан гражданскай сэриигэ, бастакы колхозтары тэрийиигэ, Аҕа дойду Улуу сэриитин кэмигэр ѳстѳѳхтѳрү кытта геройдуу охсуhуу холобура буолбут Краснодон комсомолецтарын, быйыл тѳрѳѳбүтэ 100 сылын туолбут Зоя Космедемьянская, кырыс сири туhаҕа таhаарыыга, БАМы тутууга комсомол ыччат күүстэрин-уохтарын ууран үлэлэспиттэрин билистибит. Оскуолабыт директора Андрей Викторович Новгородов бу бэлиэ күнүнэн эҕэрдэтин тиэртэ уонна урукку ыччат үтүѳ холобурун салҕаан Ийэ дойдубутугар туhалаах дьон буолуубутугар ыӊырда.
![](https://keskil14.ru/wp-content/uploads/2023/10/IMG-20231026-WA0005-1024x460.jpg)
![](https://keskil14.ru/wp-content/uploads/2023/10/IMG-20231026-WA0020-1024x768.jpg)
![](https://keskil14.ru/wp-content/uploads/2023/10/IMG-20231027-WA0005-1024x768.jpg)
Маны сэргэ тѳрѳѳбүт Сииттэбит комсомольскай ячейкатын сэкэрэтээрэ, оскуолабыт выпускнига, Сталинград куоракка сэриилэспит, Кыhыл Сулус орден кавалера Григорий Афагнасьевич Корякин туhунан география учуутала Сивцева А.Л. билиhиннэрдэ, музейга баар комсомольскай билиэттэри, комсомол устаабын, буойун учууталларбыт бары комсомол кэккэтигэр киирэн сэриигэ хорсуннук сэриилэспиттэрин, комсомольскай лиидэрдэр, БАМ тутуутугар кыттан биир дойдулаахпыт Левин Егор Денисович мэтээлинэн наҕараадаламмытын биhиэхэ билиhиннэрбитэ сүрдээх интэриэhинэй буолла. Түмүккэ комсомол ветераннара буолбут учууталларбыт «Эн комсомол – мин дьолум» ырыанан түмүктээбиттэрэ тэрээhин суолтатын оссо күүhүрдэн биэрдэ.
Бу курдук дойдубут историятын үѳрэтиигэ, билиигэ болҕомтобутун уурабыт, элбэххэ үѳрэнэбит.
Виолетта СЕРГЕЕВА VIII клаас
В.Е. Колмогоров аатынан Сииттэ орто оскуолата, Кэбээйи