Күн сиригэр олорорбут тухары кэрэни кэрэхсиибит, кэрэҕэ дьулуһабыт. Биһиги аттыбытыгар араас талаанннах, дьарыктаах дьон үгүстэр.
Мин, учуутал идэлээх киһи, оҕо талааныгар куруук сүгүрүйэбин. 24 сыл усталаах туоратын тухары илиим иһинэн араас оҕо кэлэн аастаҕа. Оҕо барыта эриэ-дэхси буолбат. Ордук доруобуйаларынан хаччахтаах оҕолорго уустук. Онуоха социальнай педагог үлэтэ, көмөтө ордук көдьүүстээх.
Биһиги оскуолабытыгар 31 доруобуйатынан хааччахтаах, 13 инбэлиит оҕо үөрэнэр. Ураты оҕолору кытта үлэ үгүс болҕомтону эрэйэр, эппиэтинэһи сүктэрэр – олоххо бэйэлэрин миэстэлэрин тирэхтээхтик булуналларыгар, уопсастыбаҕа кимтэн да, туохтан да итэҕэһэ суох сананан, эрэллээхтик сылдьалларыгар.
Июлия Степанова 15 саастаах ураты кыыс. Талааннаах, дьулуурдаах, тулуурдаах оҕо буоларын «В мире мозаики» диэн бастакы айар быыстапкатыгар көрдөрдө. Күннэтэ алтыһар доҕотторо, дьоно-сэргэтэ Июлия сатабылын сөҕө-махтайа көрдүлэр.
Хамсык ыарыытын кэмигэр буолбут хааччахтааһыннар кэмнэригэр Июлия ийэтинээн Валентина Николаевналыын оҕуруо мозаикатынан дьарыктаммыттар. Ийэ кыыһа тарбаҕар талааннааҕын таба тайанан, бииргэ үлэлээн, дьарыктанан барбыттар. Июлия бастаан учууталын Аграфена Николаевна Туприна көмөтүнэн пазл хомуйарын көрөр этибит. Оҕо сатабылын таба көрөр, ирдэбиллээх учуутал барытын ситэттэрэн, тиһэҕэр тиэрдэр этэ. Итинник пазлтан саҕалаан, Июлия мозаиканы баһылаабыта. Маныаха төрөппүт көмөтө эмиэ кырата суох оруолу оонньуур. Мозаика элбэх материальнай көмөнү ирдиир үлэ. Июлия эбэтэ, ийэтэ сөптөөх усулуобуйа тэрийэн көмөлөспүттэрэ.
Июлия Степанова айар быыстапкатыгар 20-чэ үлэтиттэн талан 9 үлэтин дьон-сэргэ көрүүтүгэр таһаарда. Олус улахан үлэлэр. Саамай кыралара 50×30, улахаттара 70×50 кээмэйдээх хартыыналар. Аны олус хаачыстыбалаахтар. Эбэлээх эһэтин хаартыскаларын ийэтэ Кытайга сакаастаан мозаика оңорторбут. Быыстапка оскуола саамай көстүүлээх сиригэр турда. Көрөөччүлэр быыстапка туһунан бэйэлэрин санааларын суруйбуттар. Кинилэр ортолоругар иккис кылаас оҕолоро «Олус үчүгэй!», «Наһаа үчүгэй!» диэн ис сүрэхтэриттэн суруйан хаалларбыттар. Оҕо оҕоттон үөрэнэр үтүө холобура!
Июлия бастакы быыстапкатын оскуолабыт дириэктэрин Суруяна Валерьевна Неустроеваны кытта лиэнтэни быһан, арыйдылар. Кини олус үчүгэй эҕэрдэ тылларын анаата уонна улахан да улахан мозаиканы бэлэх туттарда.
Бу күн Июлияҕа оҕо саадын музыкальнай салайааччыта А.Д. Черкашина, бастакы учуутала О.Н. Арьянова, Т.Л.Туприна, ийэтин коллегалара, эбэтэ Елена Ильинична Степанова, учуутала А.Н. Туприна эҕэрдэ бастыҥын анаатылар, бэлэх туттардылар. Кыысчаан үөрүү бөҕөтө! Үлэлэрин анал хааларга сааһылаан, хараҕын харатын курдук харыстаан илдьэ сылдьар.
Быыстапкаттан олус астынан тарҕастыбыт. Оҕобут, талааннаах кыыспыт олох суолун устун этэңңэ айаннаа! Ситиһиилээх киһи буол! Өссө ай, тут, киһини сөхтөтөр хартыыналары оҥор!
Надежда ТУПРИНА, ветеран учуутал, Үрүҥ Хайа, Анаабыр.