Бүгүн Дүллүкү орто оскуолатын оҕолоро Бүлүү Эбэ биэрэгин ыраастыы нэһилиэкпититтэн 7 биэрэстэлээх Саҥа Аппаҕа баран кэллибит.
Биэс кылаас оҕолоро түмсэн, бары иллээхтик-эйэлээхтик үлэлээтибит. Биһигини кытта кылааспыт салайааччылара сылдьыстылар. Хомуллубут бөҕү-сыыһы кууллаан, илдьэ кэлэн сыбаалкаҕа хааллардыбыт.
Үлэбитин бүтэрэн баран оҕолор бары төгүрүччү олорон дьиэбититтэн илдьэ кэлбит өйүөбүтүнэн чэйдээтибит. Инникитин сиргэ бултуу, сынньана тахсар дьон мээнэ малы-салы бырахпаттара, дьаһайан иһэллэрэ буоллар диэн кэпсэттибит. Төрөөбүт айылҕабытын ырааһырдар, харыстыыр үлэҕэ кыттыбыппытыттан бары астынныбыт, киэн тутуннубут.
Айыына Петрова, IX кылаас, «Эрчим» медиакиин, Дүллүкү, Үөһээ Бүлүү