«Далбарай» диэн ааттаах үҥкүү бөлөҕө Тыараһа нэһилиэгэр тэриллибитэ 10 сылын бэлиэтээн үҥкүү дьоро киэһэтин тэрийдилэр.
Бу тэрээһин Арассыыйаҕа Дьиэ кэргэн, Саха Өрөспүүбүлүкэтигэр Оҕо саас, Таатта улууһугар Эрэл, Таптал, Итэҕэл сылларыгар ананан Лука Турнин аатынан «Алгыс» норуот айымньытын дьиэтигэр үҥкүү үтүө түһүлгэтэ буолан ааста.
«Далбарай» үҥкүү бөлөҕүн салайааччыта Тыараһа орто оскуолатын биология учуутала Федора Антоновна Попова 10 сыл анараа өттүгэр 2014 сыллаахха Кыйыбытыгар улуустааҕы үҥкүү күрэҕэ ыытылларыгар орто уонна коррекционнай оскуола учууталларын көҕүлээн тэрийбитэ. Кэлин нэһилиэкпит балыыһатыттан, культура эйгэтиттэн, оҕо уһуйааныттан үҥкүүнү сэҥээрээччилэр киирэн, нэһилиэкпит орто саастаах үҥкүүһүттэрин бөлөҕө диэн буолаллар. Өрөспүүбүлүкэ, улуус таһымнаах араас күрэхтэргэ кыттан, ситиһиилэнэн, сахалыы да, атын норуоттар да үҥкүүлэрин туруоран көрөөччүлэр сэҥээриилэрин ылаллар. Ол курдук «Ыһыахха ыҥырыы», «Дэгэрэҥ», «Саламалаах үҥкүү», «Көлүччэм», «Сибэккилэр», «Сахам симэҕэ», монгольскай, казахскай, нууччалыы, корякскай уо.д.а. үҥкүүлэр репертуардарыгар бааллар. Бу 10 сыллаах үбүлүөйдэригэр үҥкүү ансаамбылыгар сылдьааччылар оскуола оҕолоругар бэйэлэрэ үҥкүү туруоран, элбэх оҕо үҥкүүлээн сыанаҕа таҕыста, онон төрөппүттэр да, оҕолор да олус астыннылар.
Нэһилиэкпит эдэр ийэлэрин «Мичийэ», аҕам саастаахтарын «Алаас Күбэйэ» үҥкүү бөлөхтөрө үҥкүү үөрэтэн, эҕэрдэлээн эмиэ кыттыстылар. Онон бэрт сэргэх толору үҥкүүттэн турар кэнсиэри астына-дуоһуйа көрдүбүт.
С. И. Турнина I кылаас үөрэнээччилэригэр «Дьэдьэнньиттэр» үҥкүүнү, II кылаастарга Н.А.Турнина, Д.В. Попова «Полька» үҥкүүнү, III кылаас кыргыттарыгар, ону таһынан VII уонна X кылаастарга Ф.А. Попова татарскай, «Дьиэрэҥкэй», «Оһуохай» үҥкүүлэри, IV кылаас оҕолоругар Е.С. Пудова «Пионерский марш» үҥкүүнү, V-VI кылаастарга Р.Н. Егорова «Сайылык оҕолоро», VII-VIII кылаас кыргыттарыгар Г.С. Сабарайкина аныгы үҥкүүнү, коррекционнай оскуола-интэринээт оҕолоругар М.С. Пономарева, А.Н. Кашкина «Буратино» үҥкүүнү үөрэттилэр.
Лилия Чехченнонова, VIII кылаас,
«Сайдыс» медиакиин кэрэспэдьиэнэ,
М.Н. Турнин аатынан Тыараһа орто оскуолата, Таатта улууһа