Биһиги нэһилиэкпитигэр Кустуурга 745 киһи олорор. Мантан 80-на оскуолаҕа үөрэнэр, 46-та оҕо саадыгар сылдьар.
Оскуолабытыгар «Гордимся своими земляками Героями» истиэндэ арылынна. Анал байыаннай дьайыыларга Хорсун быһыы уордьанынан наҕаардаламмыт Иван Гороховка «Помним. Гордимся» диэн Герой паартата туруорулунна.
Оскуолабыт коллектива үүнэр ыччаты патриотическай өйгө-санааҕа иитиигэ улахан болҕомтотун уурар. Онно аналлаах элбэх тэрээһиннэр ыытыллаллар. Физическай култуура учууталлара И.Е. Колесов, В.А. Попов, М.И. Горохов сыл устата араас күрэхтэри, дьарыктары ыыталлар. Оскуолабыт дириэктэрэ М.А. Горохова өйөбүлүнэн, быйыл оскуола иһинэн «Юнармия» тэриллэн, онуоха сөптөөх таҥас-сап сакаастанан кэллэ.
Анал байыаннай дьайыы кыттыылаахтарыгар анаммыт акцияларга оскуола коллектива көхтөөхтүк кыттар. 8 миэтэрэ маскировочнай сетканы оҥорон тустаах киһиэхэ аадырыстаан туттарбыппыт. «Дарим тепло Герою» акциянан сылаас таҥас хомуйа, байыастарбытыгар ыыттыбыт. Волонтердар нөҥүө уолаттарбыт туохха наадыйалларын ыйыталаһан, бэйэбит көмөбүтүн анаатыбыт.
Оскуола оҕолоро эйэлээх олох иһин туруулаһа сылдьар убайдарыгар, биир дойдулаахтарыгар сурук суруйаллар, кинилэр ийэлэригэр, дьиэ кэргэттэригэр көмөлөһөллөр.
Валентина КОЛЕСОВА,
Кустуур орто оскуолатын учуутала, Эбээн Бытантай.