2024 сыл – И.Р. Петров төрөөбүтэ 110, Т.Е. Сметанин – 105 сыллара
Сир күнүгэр «Хоһоон хоспоҕо» бырайыак «Кэскиллээх дойдубут Кэбээйи» бастакы түһүмэҕэ ыытылынна. Кыттааччылар Кэбээйи улууһуттан төрүттээх биир дойдулаахтарбыт хоһоонноруттан иккини толору үөрэтэн нойосуус аахтылар.
«Хоһоон хоспоҕо» диэн өйдөбүл Иван Романович Петров ахтыытыгар олоҕурар: «… Төрдүскэ Гаврил Иванович–Биилин диэн учуутал үөрэтэ сылдьыбыта. Кини поэт этэ. Тима биһикки учууталбытын үтүктэн, киниттэн үөрэнэн, хоһоон суруйар идэлэнэн барбыппыт. Биилин сотору-сотору «Үөрэх ыҥырыыта» диэн Эллэй хоһоонун өйүттэн нойосуус ааҕара. Онтон ыла куоталаһа-куоталаһа хоһоону өйбүтүттэн ааҕар, артистыыр идэлэммиппит. Ордук Тимабыт хоһоон «хоспоҕо» буолбута…». Бу курдук үөрэнэн-улаатан Тимофей Сметанин хомоҕой тыллаах-өстөөх поэт буоллаҕа, өлбөт-сүппэт айымньыларыгар күүстээх санаатын уонна мындыр толкуйун хааллардаҕа.
Кыттааччылар Иван Петров, Тимофей Сметанин, Иннокентий Левин, Григорий Кобяков, Анастасия Левина, Владимир Федоров, Иосиф Кобяков, Татьяна Винокурова хоһооннорун аахтылар. Олохтоох хоһоонньут автордар Саргылана Докторова-Айар Саргы уонна Ньургустаана Дьяконова-Таана сыаналаатылар. Тэрийээччилэр – хоһоону таптааччылар А.А. Егорова, В.Н. Заровняева сөбүлүүр хоһооннорун билиһиннэрдилэр.
Ийэ дойдубут туһунан хоһооннору үөрэтэн билиибитин кэҥэтэбит.
Кристина Оконешникова, 11 кылаас, «Нуклеус» пост, Кэбээйи.
Хаартыскаҕа: тэрээһин кыайыылаахтара уонна кыттааччылар.