Сылын аайы үѳрэх тэрилтэлэригэр ыытыллар профориентационнай үлэнэн Баппаҕаайы орто оскуолатын оҕолоро нэhилиэкпит тэрилтэлэригэр сылдьаллар. Быйыл ахсынньы 1 күнүгэр кылаастар тэрилтэлэргэ экскурсиялаатылар, үлэлэрин билистилэр.
Нарыйаана Федорова, 11 кылаас: 1 күнүгэр “Единый день профессионального самоопределения” тэрээһин чэрчитинэн биһиги, 11 кылаас үөрэнээччилэрэ (салайааччыбыт Иванова С.П.) олохтоох дьаһалтаҕа сырыттыбыт. Нэһилиэк баһылыгын солбуйааччыта Алексеев Гаврил Иванович көрсөн тэрилтэ үлэтин туһунан, хас биирдии специалист тугунан дьарыктанарын, нэһилиэк бюджетын, олох-дьаһах тупсарын туһугар туох үлэ ыытылларын сиһилии кэпсээтэ, билиһиннэрдэ. Биһигиттэн ханнык үөрэххэ туттарсан туох идэни баһылыыр баҕалаахпытын, ханнык үлэ эйгэлэрин интэриэһиргиирбитин, нэһилиэк инники сайдыытын туһунан санааларбытын ыйыталаста. Араас идэлээх үлэһит дьон быһа холоон төһө хамнастаах буолуохтарын сөбүн, хамнас алын кээмэйин, улуус урбаанньыттарын уонна эдэр дьон бэйэ дьыалатын тэрийиини хайдах саҕалыахтарын сөбүн туһунан бэрт интэриэһинэйдик кэпсээтэ, үгүс сүбэ-ама биэрдэ. Биһиги бу көрсүһүүттэн элбэҕи биллибит, инники олохпутугар да туһалаах буолуо дии саныыбыт.
2 уонна 10 кылаас үѳрэнээччилэрэ (салайааччылара Жиркова И.Н., Винокурова А.С.) балыыhаҕа экскурсияҕа сырыттылар. Олохтоох фельдшер Тарасова Мотрена Николаевна оҕолору бэрт истиҥник кѳрүстэ. Саҥа сып-сырдык, ып-ыраас балыыһа устун кэритэ сылдьан ханна, хайдах, туох туттуллуохтааҕын, ким тугу гынарын барытын сиhилии кэпсээтэ, кѳрдѳрдѳ. Тонометр, фонендоскоп диэн прибордарынан хайдах туттары практически оҕолорго кѳрдѳрдѳ. Ону олус сэргээн, оҕолор бэйэлэрэ тутан-хабан, иhиллээн, тыынан кѳрдүлэр, кѳрдѳрдүлэр. Икки оҕо медицинскэй үлэhит буолар баҕаларын биллэрдилэр. Түмүккэ олохтоох балыыhа коллективыгар махтал тылларын анаатылар.
Ѳрѳспүүбүлүкэ оскуолаларыгар ыытыллар ЕДПСО күнүгэр, 9 кылаас оҕолоро (салайааччы Андреева Д.Н.) М.А.Алексеев аатынан Баппаҕаайы орто оскуолатын оскуола иннинээҕи саастаах оҕолору иитэр тэрилтэтигэр сырыттылар. Методист Николаева Элеонора Петровна кѳрсѳн, оҕо саадын кэритэн кѳрдѳрдѳ, группаларынан сырытыннарда. Кыралар гураппаларыгар иитээччи Алексеева М.М., кѳмѳлѳһѳѳччүтэ Николаева Л.В., улахаттарга Новикова С.Ю., Татаринова Л.П. кѳрсүбүттэрэ. Алексеева Алевтина Анатольевна, Элеонора Петровна иитээччи үлэтин сиhилии билиhиннэрбиттэрэ. Кыра оҕолору кѳрѳр идэ уустук, эппиэтинэстээх буоларын ѳйдѳѳтүлэр.
Яковлев Харысхан, 7 кылаас: 7 кылаас оҕолоро (кылаас салайааччыта Иванова М.К.) муниципальнай тэриллии олохтоох дьаhалта үлэтин баран билсибиппит. Нэhилиэк баhылыгын солбуйааччыта Алексеев Гаврил Иванович үѳрэ кѳрсүбүтэ. Уопсайа тэрилтэ 4 үлэhиттээх, нэhилиэк чэчирии сайдарыгар үлэлииллэр эбит.
1 уонна 4 кылаас оҕолоро (салайааччылара Тарасова Л.С., Оленова С.Д.) «Алаhа» сынньалаҥ киинигэр сырыттылар. Кулуупка киирэн бастаан нэhилиэк библиотекатын кытта билсистилэр. Библиотекарь Сидорова Айталина Михайловна оҕолору үѳрэ кѳрсѳн, үлэтин, кинигэлэрин, почтанан сурутуу сурунааллары кэпсээтэ. Оҕолор истиэнэҕэ ыйанан турар саха суруйааччыларын мэтириэттэрин, сонун кинигэлэри сэргээтилэр. Интэриэhиргии кѳрбүттэригэр ыйытыылары биэрдилэр, элбэх кинигэ, сурунаал баарын сѳхтүлэр. Художественнай салайааччы Григорьева Туяра Кирилловна бэйэтин хоhугар киллэрэн, кулууп үлэтин билиhиннэрдэ, фойеҕа баар тыыл, үлэ бэтэрээннэрин хаартыскаларын кѳрдѳрѳн, оҕолор эбэлэрин, эhэлэрин буллулар, бильярд оонньуутун кѳрѳн, мээчиктэрин тутан-хабан, остуолга сүүрдэн ыллылар. Бу курдук биир эмиэ интэриэhинэй үлэ туһунан элбэҕи биллилэр.
3 кылаас уонна 6 кылаас оҕолоро (салайааччылар Шамаева А.Н., Степанова Н.Е.) профориентацияҕа анаммыт күҥҥэ “Сибойл” компания Илбэҥэтээҕи филиалын кѳрѳн, үлэтин билистибит. Биhигини салайааччы Харлампьев Константин Харлампьевич кѳрсѳн, «Сибойл» станция үлэтин – хамнаһын, эбээhинэстэрин билиһиннэрдэ. Оҕолор олус интэриэhиргээн элбэҕи ыйыталастылар. Ол курдук, филиалга хас үлэhит баарын, хайдах үлэлииллэрин, Саха сиригэр хас маннык филиал баарын, хамнастара тѳһѳтүн, гаас, бензин, сэлээркэ сыанатын тоокколостулар. Гаас сыаната бензинтэн иккиттэн ордук тѳгүл чэпчэкитин биллилэр. Компания элбэх килийиэннэри угуйаары техникаҕа сыhыаннаах табаары, бородуукта арааhын, түргэнник оҥоhуллар итии кофе, гамбургер, бургер, ходдог да атыылыыллар эбит диэн кѳрдүлэр, амсайан да ыллылар. Бэрт сэргэх интэриэhинэй күн ааста. Константин Харлампьевичка, илдьэ сылдьыбыт суоппарбытыгар Алексей Васильевичка махталбытын тириэрдэбит.
Түмүктээн эттэххэ, оҕолор сылдьыбыт сырыыларыттан астыннылар, тэрилтэ, хас биирдии идэ ис тутулун, үлэтин, эбээhинэстэрин сиhилии биллилэр, идэ барыта наадалаҕын ѳйдѳѳтүлэр. Онон инникитин элбэх идэни билсэн иhиэхпит, идэ таларбытыгар олус наадалаах тэрээhин буоларын бэлиэтиибит.
“Кѳмүс бѳрүѳ” медиа – киин кэрэспэдьиэннэрэ,
М.А.Алексеев аатынан Баппаҕаайы оскуолата
Илбэҥэ, Бүлүү.