Чурапчы улууһун Субуруусскай аатынан Болтоҥо орто оскуолатыгар «Сардаҥа» оҕо киинэ олус таһаарыылаахтык үлэлиир. Маны дириэктэр Скрябин Владислав Романович сүбэһитэ Павлова Диана Александровна иилээн-саҕалаан ыытар. Билигин киин чэрчитинэн «Сардаҥа» сайыҥҥы лааҕыр үлэлии турар. Манна араас саастаах 30-ча оҕо сүрдээх сэргэхтик уонна туһалаахтык сайыҥҥы күннэрин атаараллар. Лааҕыр кыраайы үөрэтии хайысхатынан үлэлиир, чопчулаан эттэххэ, оҕолор дойдуларын үүнээйилэрин чинчийэллэр. Салгыы бу бырайыагы хаҥатан, аныгылыы технологияларынан толорон биэрэн таһаарыы оҥорор санаалаахтар. Лааҕырга кыраайы үөрэтии таһынан араас атын дьарыгы ыыталлар, ол курдук оҕолор фольклорунан дьарыктаналлар, чабырҕахтыыр, олоҥхолуур да кырачааннар бааллар. Оннооҕор күрэххэ кыттар формаларын оҕолор салайааччыларын кытта сүбэлэһэн ураты быһыылаах-таһаалаах, дизайнаах оҥотторон ылбыттар.
Чопчулаан эттэххэ, оҕо киинэ төгүрүк сылы быһа үгүс бырайыагы тэрийэн ыытар. Онно оҕолор инициативаларанын нэһилиэк олохтоохторо, салалта, төрөппүттэр бары өттүнэн өйүүр буоланнар үөрэнээччилэр харса суох саҥаттан саҥаны толкуйдаан олоххо киллэрэн иһэллэр. Быйыл Кыайыы 80 сылын көрсө бэйэлэрэ ааҕан саллааттар суруктарын таһаарбыттар. Араас открыткаттан, таҥаска, иһиккэ ойуу түһэрэртэн саҕалаан, дьарыктанар кабинеттарын ис-тас көрүҥүн бэйэлэрэ толкуйдаан оҥороллор эбит. Киин оҕолоро медиа эйгэтин баһылыыллар. Бэйэлэрэ устан, суруйан, монтажтаан нэһилиэк, оскуола олоҕор сыһыаннаах сонун таһаарыылары оҥороллор, техниканы, искуственнай интеллеги тутта үөрэнэллэр.
Ону таһынан кинилэр нэһилиэк устуоруйатын сыныйан үөрэтэллэр, биллэр дьоннорунан киэн тутталлар, кинилилэр тустарынан сырдаталлар, араас форумнарга кытталлар. Манна баран эттэххэ, аҥаардас Болтоҥо сирэ-дойдута сахаҕа түөрт норуот суруйааччытын бэлэхтээбит. Онтон да атын биллиилээх суруйааччылара, учуонайдара, спортсменнара, бэлиитиктэрэ элбэхтэр, ону оҕолор барыларын ааттарын-суолларын билэллэр.
Улуу убайбыт Семен Андреевич Новгородов төрөөбүт сирэ-буора дэлэҕэ да талааннаах дьонунан аатырыа дуо.
Н.Е. Мординов аатынан «Кэскил» оҕо таһаарыыларын үлэһиттэрэ Болтоҥо оскуолатыгар ыалдьыттаан, маны барытын олус сэргээн билистэ, үгүс идиэйэни хомуйдулар. Оскуола, оҕо киинэ, нэһилиэк бэйэтин устуоруйатыгар уонна ыччатын сайдыытыгар, иитиитигэр сүҥкэн болҕомтону ууралларын сөҕө махтайдылар, атын нэһилиэктэргэ үтүө холобур буолалларын үөрэ бэлиэтээтилэр.
Биһиги кыһабыт Болтоҥо оскуолатын «Cардаҥа» оҕо киинин кытта таһаарыылаахтык үлэлэһиэхпит, үгүс саҥаны тэрийиэхпит диэн бигэ эрэллээхпит.
Прокопий Софронеев, Ольга Янцен, keskil14.ru