Олунньу 22 күнүгэр “Синема” кинотеатрга “Хапсыһыы” (Схватка) киинэ премьератыгар сырыттым уонна санаабын үллэстиэхпин баҕарабын.
Киинэ үчүгэйдик уһуллубут. Киһини долгутар түгэннэрэ элбэх. Киинэни көрө олорон ыарахан дьылҕалаах спортсмены аһынным, хараҕым уута хаста да тахса сыста.
Иккиһинэн, киинэ сүрүн геройа Роман Дмитриев туһунан хаһыаты уокка бырахпытын олох сөбүлээбэтим. Итинник гыммытыгар соһуйдум. Ыскаабыгар ыраах уура барда дии санаабытым. Киинэ кэнниттэн “Вячеслав Карпов Роман Михайлович Дмитриев Олимпийскай чемпион буолбутугар кырдьык ымсыырбыта буолуо дуо?” диэн толкуй киирдэ. Холобур, Вячеслав Карпов биографиятын билбэт киһи киинэни көрөн кырдьык оннук эбит диэн итэҕэйиэн сөп.
Ол гынан баран, Роман Дмитриев уонна Антонина Дмитриева “Наука побеждать” кинигэлэригэр 30-с страницаҕа: “Чемпиону ХХ Олимпийских игр Роману Дмитриеву от команды-земляков!
Желаю тебе найти самую лучшую девушку мира и растит детей такими какой ты сам.
От имени команды: В. Карпов, Н. Неустроев” – диэн Вячеслав Карпов суруйбут баҕа санаата, хаартыската баар.
Киинэҕэ көрбүт геройум олус үчүгэй буочардаах эбит. Дьиҥнээх олоххо Роман Михайловичка баҕа санаатын наһаа үчүгэйдик тиэрдибит. Онон сорох историческай түгэннэр “Хапсыһыы” киинэҕэ атыннык киирбиттэр эбит. Мин киинэҕэ буолбакка, “Наука побеждать” кинигэҕэ итэҕэйэбин.
Ити бэйэм санааларым. Тустууну, спорду үчүгэйдик билэр дьоннор, спортсменнар, киинэ критиктара санааларын этиэхтэрэ дии саныыбын.
Айхал МАТВЕЕВ, XI кылаас, Дьокуускай