Талан ылбыт идэҕэ бэриниилээх буолуу, биир сиргэ түптээн өр сылларга үлэ – киһи биир ураты хайҕаллаах хаачыстыбата буолар.
Биһиги оскуолабытыгар 42-с сылын алын кылаас учууталынан Анастасия Николаевна Захарова үлэлиир. Кини Саха Өрөспүүбүлүкэтин үөрэҕириитин туйгуна, РФ уопсай үөрэхтээһинин бочуоттаах үлэһитэ.
Анастасия Николаевна Дьяконовтар династияларыгар киирэр. Бу династияны кинилэр аҕалара Аҕа дойду улуу сэриитин кыттыылааҕа, «Албан аат» орден 3 степенин кавалера Николай Михайлович Дьяконов саҕалаабыта. Николай Михайлович история учууталынан, оскуола дириэктэринэн өр сылларга үлэлээбит. Кини биэс оҕотуттан түөрдэ учуутал идэтин талбыттар. Династия уопсай педагогическай стаһа 186 сыл буолбут.
Анастасия Николаевна эдьиийэ Римма Николаевналыын алын кылаас учууталынан 40-тан тахса сыл үлэлээбиттэр. Кинилэр «Дьяконовскай ааҕыылар» диэн научнай-практическай кэмпириэнсийэни 5 сыл устата тэрийэн ыыттылар. Сыл ахсын өрөспүүбүлүкэ араас оскуолаларыттан сүүстэн тахса оҕо кыттыыны ылар.
Дьяконовтар династиялара өр сылларга үгүс көлүөнэ ыччаты иитэн-үөрэтэн таһаарбыт үтүө өҥөлөөх. Өссө даҕаны үлэлии-хамсыы, айа-тута сылдьыҥ!
Амелия Сивцева, Дарья Васильева, Вероника Скрябина,
«Маралаайы кэскилэ» пресс-киин
Мугудай, Чурапчы