Атырдьах ыйын 9 күнүгэр буолбут «РФ сенатора Егор Афанасьевич Борисовы кытта биир күн» пресс-тур бырагыраамматын бастакы түһүмэҕинэн Егор Борисов төрөөбүт-үөскээбит уһаайбатын кэрийии буолбута.
Үһүс бэрэсидьиэн, бастакы Ил Дархан Егор Борисов суруналыыстарга төрөөбут-уескээбит уһаайбатыгар ааспыт олоҕун бастакы кэрчигин сырдаппыта.
Уһаайбаларыгар төрөппүттэрэ 1952 сыллаахха олохсуйбуттара. Аҕата Афанасий Егорович Чурапчы «Сельхозтехникатыгар» механизаторынан үлэлиирэ. Егор Борисов ахтарынан тугу барытын сатыыр көмүс илиилэх киһи этэ, эбиитин булчут уонна балыксыт бэрдэ буолара. Эр киһи буола улаатарыгар улахан оруолу оонньообута. Ийэтэ Прасковья Ильинична дьиэтин-уотун көрөрө. Хойутуу кэргэнэ суох буолбутун кэннэ оҕолорун аһатаары-иитээри уһуйааҥҥа үлэлээбитэ. Төрөппүттэрэ иккиэн үөрэҕэ суох эрээри, туруу үлэһит этилэр.
Ол саҕана Чурапчы кыра бөһүөлэк буолан, дьиэлэрэ нэһилиэк кытыытыгар турара. Арҕаа өттө тула тайҕа этэ. Айылҕаҕа чугас олорор буолан Егор кыра эрдэҕиттэн аҕатын кытта бултуура, балыктыыра. Кыһын бэйэтэ ойуурга баран туһахтыыра. Дьиэ кэргэнэ сүөһү ииттэр буолан оттуура, хотоҥҥо үлэлиирэ. Ол иһин кыра эрдэҕиттэн үлэ диэни билэн улааппыта. Аҕата механизатор буолан, Егор оҕо эрдэҕиттэн техникаҕа сыстаҕас буола улааппыта.Ол курдук бэлэһэппиэти, матаһыыкылы ыһарын-таҥарын сөбүлүүрэ. Техникаҕа тапталын билигин да илдьэ сылдьар буолан, массыына ыытарын олус сөбүлүүр. Бэйэтэ этэринэн Борисовтар дьиэ кэргэттэрэ бары техникаҕа улахан сыстаҕастар,оннооҕор кырачаан сиэнэ массыына уруулун билиҥҥиттэн былдьаһа сатыыр.
Аҕата, Егор 15 саастааҕар, эмискэ олохтон туораабыта. Онтон ыла 8 оҕоттон улаханнара буолан дьиэ-кэргэн тутаах киһитэ буолбута. Дьиэ хаһаайынынан хаалан кыра бырааттарыгар, балтыларыгар аҕаны солбуйбута. Бииргэ төрүөхтэрэ бары үөрэхтэнэн үлэһит бэрдэ буолбуттара. Учуутал, инженер-механик, тыа хаһаайыстыбатын үлэһиттэрэ буолан улааппыттара.
Егор Борисов улаатан баран, төрөөбүт-улааппыт сирин умнубатаҕа, уһаайбатын чөлүгэр түһэрэн, икки этээстээх дьиэни туттубута. 1977 сыллаахха сыбаайбатын төрөөбүт уһаайбатыгар ылбыта. Тапталлаах кэргэнинээн Прасковья Петровналыын, бииргэ олорбуттара 47-с сыла буолла.
Егор Афанасьевич билигин РФ сенатора буолан сүрүн үлэтинэн Москуба куоракка олорор. Ол эрээри хас биирдии уоппускатын аайы Чурапчыга сынньана кэлэр. Сиэннэрин көрөр, төрөөбүт дойдутугар дуоһуйа сынньанар. Борисовтар – киэҥ аймахтар. Көрсүһэр түгэннэригэр ахтылҕаннарын таһааран, санааларын үллэстэн, бэйэ-бэйэлэригэр бэлэх туттарсар үтүө үгэстээхтэр.
Николай АНДРЕЕВ