“Дойдубут аатын көхсүбүтүгэр сүгэ сылдьан көмүскүөхпүт!”

Муус устар 13 күнүгэр Эмис нэһилиэгэр Н.С. Захаров-Сахаачча аатынан Амматааҕы оҕо спортивнай оскуолатын көҥүл тустууга тренерэ, Саха өрөспүүбүлүкэтин үөрэҕириитин туйгуна, көҥүл тустууга ССРС спордун маастарыгар кандидат Илья Анатольевич Солдатов сырдык кэриэһигэр аналлаах 2008-2009, 2010-2011, 2012-2013, 2014-2015 сыллаах төрүөх уолаттарга улуустааҕы тустуу күрэҕэ ыытыллар.

Муус устар 11 күнүгэр бу турниры көрсө үөрүүлээх түгэн буолан ааста. Ол курдук нэһилиэк чиэһин көмүскүүр эдэр тустууктарга алгыс үтүө тылларын этэн туран, уолаттарга уонна кинилэр тренердэригэр Аркадий Николаевич Тастыгиҥҥа анал футболкалары туттардылар. https://t.me/+fnsemAkkXPVkMzli

Бу ыытыллар турнирга Эмис нэһилиэгин чиэһин 21 кг Костя Платонов, 24 кг Даниель Петров, Сайнар Левин, 27 кг Алеша Захаров, Арсений Яковлев, Алик Ноговицын, 31 кг Ян Васильев, Эрсан Васильев, 38 кг Ильяр Солдатов, 40 кг Дамир Солдатов, 41 кг Матвей Тимофеев, 50 кг Семен Степанов, 52 кг Айгылан Николаев, Семен Васильев көмүскүөхтэрэ.

Эмис оскуолатыгар 35 сыл физкультура учууталынан үлэлээбит Иосиф Васильевич Петров уолаттарга үтүө тылын анаата, Илья Анатольевич туһунан кэпсээтэ.

“Илья Анатольевич биһиги оскуолабытыгар үөрэнэн, тустууга бастакы хардыыларын манна дойдутугар саҕалаабыта. Кини кыра эрдэҕиттэн бэрээдэктээх, тустууга олус улахан баҕалаах уол этэ. Тустуу өттүнэн өссө сайдыам диэн бэһис кылаастан Аммаҕа Сахаачча аатынан оҕо спортивнай оскуолатыгар үөрэнэ барбыта. Онно интернакка олорон үөрэммитэ. 1992- 2004 ссс. дойдутугар Эмискэ кэлэн тренеринэн үлэлээбитэ. Үчүгэй үлэлээх тренер буолан, салгыы Аммаҕа үлэлэтэ ылбыттара. Илья Анатольевич 30-ча сыллаах тохтобул кэнниттэн, 1990-с сыллартан саҕалаан, оҕолору, төрөппүттэри, учууталлары кытта бииргэ үлэлээн нэһилиэкпит тустуутун саҥа таһымҥа таһаарбыта. Онтон билигин, 20-тэн тахса сыллаах тохтобул кэнниттэн, Илья Анатольевич үлэтин биһиги нэһилиэкпитигэр кини доҕоро, бииргэ үлэлээбит коллегата Аркадий Николаевич Тастыгин салҕыыр. Онон эһиги тренергитин кытта нэһилиэккэ тустуу сайдыытын киллэрэр саамай эппиэтинэстээх кэмҥэ түбэстигит. Муус устар 13 күнүгэр ыытыллар Илья Анатольевич турнирыгар ситиһиилээхтик кыттаргытыгар баҕарабын”, – диэн эдэр бөҕөстөргө баҕа санаатын эттэ.

Эмис оскуолатыгар 40-ча сыл учууталлаабыт ветеран учуутал Анатолий Алексеевич Михайлов спорт киһиэхэ суолтатын туһунан маннык эттэ: “Спорт диэн киһи этин-хаанын сайыннарар. Доруобай туруктаах чөл өйдөөх-санаалаах буоларга биир саамай төһүү көрүҥ буолар. Киһи барыта чемпион буолбат эрээри, ис туруккут, өйгүт-санааҕыт сайдарыгар тирэх буолар”.

“Илья Анатольевич 1992 с. Эмискэ тренердии кэлбитигэр, нэһилиэк эр дьонноро, эрчийэр уолаттарын төрөппүттэрэ бары көмөлөөн, уолбут тула мустан, эргэ интернат дьиэтин тустуунан дьарыктанарга сөптөөх гына оҥорон биэрбиппит. Туох баар улахан үлэтэ ити интернат дьиэтиттэн саҕаламмыта. Бу дьарыккыт эһиги сайдыыгытыгар туһалаах уонна олоххутугар биир саамай кэрэ кэмҥит буолуон баҕарабын. Элбэхтик дьарыктанан, нэһилиэкпит аатын ааттатар чэгиэн-чэбдик дьон буолуҥ!” – диэн Анатолий Алексеевич эдэр тустууктарга үтүө санаатын эттэ.

Эмис нэһилиэгэр тустуу секцията, И.В. Петров эппитин курдук, 20-ча сыллаах тохтобул кэнниттэн, 2023 сыл сэтинньи ыйтан үлэлиир. Тустуу секциятын Саха өрөспүүбүлүкэтин үтүөлээх тренерэ Аркадий Николаевич Тастыгин үлэлэтэр.

Семен Васильев, Дамир Солдатов, Матвей Тимофеев, Айгылан Николаев, Алик Ноговицын, Даниель Петров, Семен Степанов, Алеша Захаров быйыл аан бастакытын кулун тутар-муус устар ыйдарга үс нэдиэлэ устата Амурскай уобалас Тында, Благовещенскай куораттарыгар уһун кэмнээх сборга сылдьан кэллилэр. Семен Васильев 52 кг Тында куоракка ыытыллыбыт “Надежда БАМа” Бүтүн Россиятааҕы турнирга чемпионнаабыт. Онон бастакы ситиһии баар диэн үөрэллэр.

Уолаттар тренердэрин кытта саҥа футболкаларын кэтэн туран: “Биир хамаанда буолан дойдубут аатын көхсүбүтүгэр сүгэ сылдьан көмүскүөхпүт”, – диэн санаалаах тарҕастылар.

Лия СОЛДАТОВА, Х “Б” кылаас,

В.Г. Короленко аатынан Амма 1 №-дээх орто оскуолата, Амма