Оҕо саас умнуллубат түгэннэрэ олоҕун устата арыаллаан, түһүүлээх-тахсыылаах кэмнэргэр тирэх, өйөбүл буолар ураты күүстээхтэр.
Амма улууһун Эмис аҕыс кылаастаах оскуолатын 1988 сыллаахха бүтэрбит Дима Солдатов билигин дьон-сэргэ ытыктаан “Дмитрий Николаевич” диир киһилэрэ. Саас ортолоох, улахан дьиэ кэргэн аҕа баһылыга, тапталлаах эһээ, илиитин массыына уруулуттан араарбатах суоппар.
Дима Солдатов оҕо сааһын биир саамай умнуллубат түгэнинэн “Океан” лааҕырга сынньаммытын ааттыыр.
Вероника Жиркова уруһуйа
– Ити 1986 сыллаахха алтыс кылааска үөрэнэ сырыттахпына саас этэ. Үөрэҕи “таһаҕас” гыммат этим эрээри, бэрээдэк өттүнэн соччото суох үөрэнээччи этим. Ону ол диэбэккэ учууталларым Дьоппуон муоратын кытылыгар турар “Океан” лааҕырга ыыппыттара. Оччолорго муораҕа буолуохтааҕар, оройуон да киинигэр баран кэлэрин тыа сирин оҕотугар улахан үөрүү буолара. “Дима ыраах айанныыр буолбут” диэн дьиэм иһигэр бэрт улахан сүпсүлгэн буолбута. Дьонум бэйэлэрэ айанныыр курдук үөрбүттэрин, сүргэлэрэ көтөҕүллүбүтүн өйдүүбүн. Ол быыһыгар “мэниктээбэккэ, үчүгэйдик сылдьаар” диэн биир кэм сүбэлииллэрэ, – Дмитрий Николаевич 37 сыл аннаараа өттүгэр буолан ааспыт оҕо сааһын умнуллубат түгэнин туһунан олус сылаастык ахтар.
Кини “Океан” лааҕырга саамай өйдөөн хаалбыта – бассейн: “Океаҥҥа” тиийбиппитигэр күн аайы бассейҥа сөтүөлэтэллэр. Мин ону наһаа сөҕөр этим уонна дойдубун Эмиспин кытта наар тэҥнээн көрөрүм. Саас хаардаахха да сөтүөлүөххэ сөп эбит, сир сир наһаа да уратылаах, атыннаах буолар эбит диэн өйдөбүлү мин аан бастаан онно билбитим. Кэлин үлэһит буолан баран, хотунан-соҕуруунан син сырыттым эрээри, “Океан” лааҕыр бассейыныгар саас хаардаахха сөтүөлээбиппин олох умнубаппын. “Океаны” наһаа сөбүлээбитим. Хойукка диэри бу мин “Океаным” диэн киэн тутта саныыр этим”.
Эмис аҕыс кылаастаах оскуолатын бүтэрэр сылларыгар, 1988 сыллаахха, кылааһынан Сэбиэскэй сойуус биир кэрэ куоратыгар Днепропетровскайга учууталларын Ольга Саввична Михайлованы, Дария Владимировна Захарованы кытта күүлэйдээн кэлбиттэрэ. “Биһиги модун Сэбиэскэй сойууспут кэрэ да куораттарынан баай эбит” диэн санаа оччолорго миэхэ күүскэ олохсуйбута.
Быйыл Дима Солдатов үөрэммит Эмис оскуолата төрүттэммитэ 100 сылын бэлиэтиир. Олоҕун орто омурҕаныгар үктэммит Дмитрий Николаевич учууталларыгар үтүө тылларын аныыр: “Оҕо сааспар «Окена» лааҕырга сынньанар умнуллубат түгэни бэлэхтээбит учууталларбар Прасковья Семеновна Неустроеваҕа, Ольга Саввична Михайловаҕа махтанабын. Киһи олоҕо түгэннэртэн турар. Ордук оҕо сааскар өйгөр хатаан хаалбыт үтүө түгэннэрин олоххор тирэх, күүс-көмө буолаллар. Ол иһин бүгүҥҥү кэм түһүүлэрин-тахсыыларын аахсыбакка, оҕолорбутугар, сиэннэрбитигэр үтүө түгэннэри утары уунан иһиэххэйиҥ!”.
Сардаана МАТВЕЕВА.