Биһиги, С.А.Новгородов аатынан Чурапчы орто оскуолатын 8-с уонна 10-с техническэй кылаас оҕолоро, сааскы каникул кэмигэр Нерюнгри куоракка профориентационнай экскурсияҕа баран кэллибит. Барыта 20 үөрэнээччи уонна 2 салайааччы буолан сырыттыбыт. Биһигини оскуолабыт психолога, директор иитэр үлэҕэ сүбэһитэ Седалищева Агафья Афанасьевна уонна 8-с техническэй кылаас салайааччыта, физкультура учуутала Захаров Николай Валерьевич илдьэ сырыттылар. 3 күн устата киэҥ программалаах экскурсияҕа сылдьан харахпыт кэҥээн, билбэтэхпитин билэн, көрбөтөхпүтүн көрөн кэллибит. Айаммыт кулун тутар 25 күнүттэн саҕаламмыта, аан бастаан таксинан тимир суол вокзалыгар, онтон поездка олорон 18 чаас устата айаннаан Нерюнгри куоракка тиийбиппит. Бары да поездка бастакыбытын айанныыр буолан барыта сонун, көрдөөх этэ.
“Колмар” диэн тэрилтэҕэ баран таас чоҕу хайдах байыталларын, чох туохха туттулларын туһунан үөрэттибит, араас опыттары оҥорон бириэмэбитин билбэккэ хааллыбыт. Иккис күммүтүгэр эбиэккэ диэри “Колмар” өрөмүөннүүр базатыгар баран үлэлэрин билистибит. Манна туох баар техникаларын барытын бэйэлэрэ өрүмүөннүүллэр, буолтатыгар, шайбатыгар тиийэ бэйэлэрин токардара оҥорон таһаараллар эбит.
Саҥа технологиянан үлэлиир ып-ыраас котельнайга сырытыннардылар. Манна кырдьык киһи наскынан да хаамар ырааһа. Онтон «Якутуголь” технопаркатыгар тиийдибит, онно араас чоҕу хостооһуҥҥа үлэлиир техниканы көрдүбүт-иһиттибит. Олус улахан БЕЛАЗ массыынаҕа тахса сырыттыбыт. Ол кэннэ “Нерюнгринский” диэн разрез смотровой площадкатыгар илдьэн техника хайдах үлэлиирин илэ харахпытынан көрдүбүт. Үөһэттэн кып-кыра массыыналар курдук көстөллөр. Маны барытын тэрилтэ үлэһиттэрэ олус сонуннук кэпсээтилэр.
Үһүс күммүтүгэр Нерюнгри куораты кытта билистибит. Олус интэриэһинэй музейга сырыттыбыт. Нерюнгри дьиэлэрэ үксэ 80-с сылларга тутуллубут буолан дьоммут кэпсиир сэбиэскэй кэмнэрин санатар. Ып-ыраас, элбэх үүнээйилээх, эйэҕэс дьоннордоох куорат эбит. Биһиэхэ Нерюнгри үтүө өйдөбүл буолан хаалыа. Сорохпут инники идэлэрин промышленноһы кытта сибээстииргэ бигэ эрэллээх кэллилэр.
Бу профориентационнай экскурсияны тэрийбит оскуолабыт дириэктэригэр Надежда Васильевна Уароваҕа улахан махталбытын тиэрдэбит. Биһигини илдьэ сылдьыбыт салайааччыларбытыгар Агафья Афанасьевнаҕа, Николай Валерьевичка үтүө сыһыаннарын иһин махтанабыт. Ону таһынан проезпытын, гостиницабытын, аһылыкпытын барытын толору төлөөбүт «Колмар”, “Якутуголь” тэрилтэлэргэ, Саха сиринээҕи промышленность уонна геология министиэристибэтигэр, чуолаан миниистир солбуйааччытыгар Кириллин Михаил Афанасьевичка, специалист Павлова Айталина Александровнаҕа махталбыт муҥура суох. Оскуола оҕолоро маннык тэрээһиннэргэ сылдьан идэлэрин таба талалларыгар көмө сүҥкэн суолталаах. Маннык экскурсиялар өссө да буоллуннар диэн баҕа санаалаахпыт.
Богдан Петров, Айаал Дьячковский, Ньургун Оконешников (10 тех. кыл.) Тимур Христофоров, Сайаана Собакина (8 тех. кыл.)
Илдьар Хоютанов, Спартак Степанов хаартыскаҕа түһэриилэрэ