Муус устар 26 күнүгэр, Таатта улууһугар баһаарынай сулууспа тэриллибитэ 85 сылыгар уонна Арассыыйа үрдүнэн олохтоммута 375 сылыгар аналлаах «Баһаары утары» диэн тиэмэлээх улуустааҕы уруһуй күрэҕин кыайыылаахтарын Ытык Күөлгэ үөрүүлээх быһыыга-майгыга наҕараадалааһын буолла.
Куонкурска барыта 120 уруһуй киирбититтэн биһиги оскуолаттан 14-16 саастаахтарга бастакы миэстэни VIII кылаас үөрэнээччитэ Хомустаан Афанасьев, иккис миэстэни мин – Ангелина Данилова ыллыбыт. Оттон 11-13 саастаахтарга бастакы миэстэҕэ Айхал Афанасьев уонна 7 саастарыгар дылы оҕолорго иккис миэстэҕэ «Кэнчээри» уһуйаан иитиллэччитэ Арина Петрова тигистилэр.
Мин баһаар буолар түгэнигэр, уолуйан турбакка, бастаан туһааннаах сиргэ төлөпүөннээн этиэхтээхпит туһунан уруһуйу оҥорбутум.
Салайааччыларбыт: Сергей Сергеевич Афанасьев – уруһуй уонна технология учуутала, Дария Иннокентьевна Винокурова – «Кустукчаан» уруһуй куруһуогун салайааччыта уонна Ньургустана Степановна Бочурова – уһуйаан иитээччитэ.
Дьүүллүүр сүбэҕэ П.С. Доргуев – улуустааҕы баһаарынай чаас караулларын начальнига, И. П. Мартынова – Таатта улууһун 32 №-дээх баһаары утары охсуһар этэрээтин инструктора, Л.П. Павлова –«Сатабыл» педагога, Н.К. Луковцева – Таатта улууһун тыатын хаһаайыстыбатын инженерэ, Р.С. Унарова – «Бастакылар хамсааһыннарын» улуустааҕы салаатын исписэлииһэ үлэлээбиттэрэ.
Сарсыарда уон чаастан оскуолаҕа мустан, бары Ытык Күөлгэ айаннаабыппыт уонна баһаарынайдарга тиийбиппит. Ол күн тыаллаах баҕайы этэ, ол да буоллар үөрүүлээх митинг таһырдьа буолбута. Таатта улууһун баһаарынай сулууспатын начальнига Дмитрий Прокопьевич Рахлеев эҕэрдэ тыл эппитэ, бастыҥ көрдөрүүлээх үлэһиттэри чиэстээбитэ уонна уруһуй күрэҕин түмүгүнэн кыттыбыт оҕолору эҕэрдэлээбитэ, грамоталары уонна анал бириистэрин туттартаабыта. Ол кэннэ уонча эдэр байыастар андаҕар биэрбиттэрэ, бэтэрээн үлэһиттэр чиэстэммиттэрэ.
Тэрээһин бүппүтүн кэннэ биһиги кыайыы-хотуу үктэллээх, элбэх ситиһиигэ эрэллээх дойдубутугар Уолбаҕа айаннаабыппыт.
Ангелина Данилова, X кылаас,
В.И. Ленин аатынан Уолба орто оскуолата, Таатта улууһа