Тиһэх чуорааҥҥа биир бэлиэ түгэнинэн Иннокентий Николаевич Слепцов династиятын аатыттан оскуола выпуснигар, XI кылаас үөрэнээччитигэр Афанасий Захаровка 20000 солк. стипендия олохтонно.
Бу стипендия сыл аайы туттарыллыбат. Быйыл Арассыыйаҕа Дьиэ кэргэн, өрөспүүбүлүкэбитигэр Оҕо саас, улууспутугар тыа хаһаайыстыбатын сылынан бэрилиннэ.
Стипендияны И.Н.Слепцов оҕолоро Михаил Иннокентьевич Слепцов, Евгения Иннокентьевна Михайлова, Гаврил Иннокентьевич Слепцов, Анатолий Иннокентьевич Слепцов, Вера Иннокентьевна Слепцова, ону тэнэ сиэннэрэ, хос сиэннэрэ Эльза, Владимир, Евгений, Иннокентий, Гаврил, Анна, Нюргуяна, Екатерина, Александра, Алексей, Ганя, Ализана, Сашенька олохтоотулар.
Афанасий Захаров бары өттүнэн дэгиттэр кыахтаах үөрэнээччи. Араас таһымнаах күрэхтэргэ, куонкурустарга оскуолатын, нэһилиэгин, улууһун чиэһин ситиһиилээхтик көмүскээн кэллэ. Ол курдук, өрөспүүбүлүкэтээҕи научнай-практическай кэмпириэнсийэлэргэ I, II истиэпэннээх дипломант. Волейболга, остуол тенниһигэр, атах оонньуутугар үрдүк ситиһиилэрдээх буолан, 2023 сыл түмүгүнэн «Сыл бастыҥ спортсмена» анал аат хаһаайына буолбута. «Бриллиантовые нотки» өрөспүүбүлүкэтээҕи фестивальга I истиэпэннээх лауреат, «Лучшая песня родного края» куонкуруска дипломант буолбута.
И.Н.Слепцов оҕолоро, сиэннэрэ, хос сиэннэрэ Афоня ситиһиилэрин өйөөн, киһи быһыытынан үтүө санаалааҕын, сахалыы сэмэй майгылааҕын бэлиэтээн, стипендия туттарбыттарын дьон-сэргэ үөрэ, уруйдуу иһиттэ. Афоняҕа экзаменнарын ситиһиилээхтик туттаран бэйэтин сөбүлүүр идэтин баһылаан, улууспутун, өрөспүүбүлүкэбитин аататыа диэн эрэнэбит.
«Биракчаан» медиакиин
И.Н. Слепцов аатынан Кустуур орто оскуолата,
Эбээн Бытантай улууһа