Бүгүн ахсынньы 24 күнүгэр үтүө үгэскэ кубулуйбут Ил Дархан харыйата СӨ Циркэтин дьиэтигэр буолан ааста. Бу тэрээһин сыллата үрдүкү кылаас үөрэнээччилэригэр анаан ыытыллар. Дьокуускай куоракка өрөспүүбүлүкэ бары улуустарыттан 500-тэн тахса саамай уопсай үлэҕэ көхтөөх, үөрэххэ кыһамньылаах оҕолор муһуннулар. Кинилэр туйгун үөрэнээччилэр, бүтүн Арассыыйатааҕы олимпиадалар, дакылаат ааҕыытын, научнай-практическай конференциялар кыайыылаахтара, бастыҥ спортсменнар.
Тэрийээччилэр кыттааччыларга анаан циркэ аренатыгар олус интэриэһинэй «Солнце Тундры» диэн дьүһүйүүнү бэлэмнээн көрүстүлэр. Оҕолор араас чаҕылхай хамсаныылары, трюктары көрөн астыннылар, дуоһуйдулар. Саҥа дьыллааҕы тыын тута барыбытыгар билиннэ.
Үөрэнээччи куруутун сайдыахтаах
Саха Өрөспүүбүлүкэтин Ил Дархана Айсен Сергеевич Николаев тэрээһиҥҥэ мустубут өрөспүүбүлүкэ үөрэнээччилэрин барыларын Саҥа дьылынан эҕэрдэлээтэ.
«Мин куруук эһиги ситиһиигитин көрө-истэ сылдьабын. Үөрэх буоллун, спорт эйгэтэ буоллун куруук инникибит. Саха сирэ өркөн өйдөөх, айар дьоҕурдаах оҕолордооҕунан киэн туттар. Сыллата дойду үрдүнэн ыытыллар араас хабааннаах бырайыактарга эһиги кыттаҕыт. Саха сирэ билиҥҥи туругунан олус үчүгэй инникилээх дии саныыбын. Онтон биһиги сайдар, ситиһиигэ дьулуһар кыаххытын өйүүбүт. Тоҕо диэн, эһиги биһиэхэ бааргыт. Эһиги ситиһиигит биһиги ситиһиибит. Онон саҥа кэлэр 2024 сылы Оҕо саас сылынан биллэрдибит. Оҕолорбутугар анаан элбэх оскуола, оҕо саада, араас туһалаах эйгэлэр тутуллуохтара, арыллыахтара. Маны таһынан, Арассыыйа таһымнаах олимпиадаларга үрдүк көрдөрүүлээх оҕолорбутугар 500 тыһ., онтон үрдүк ситиһиилээх призер оҕолорбутугар 100 солк. аныыр буолуохпут. Үөрэнэр баҕа санааҕыт хаһан да уҕараабатын. Куруук билиигэ, үөрэххэ, үлэҕэ тардыһыылаах буолуҥ! Дьолу, ситиһиини!»
«Сыл бастыҥнара»
Бастыҥнар Ил Дархан анал истипиэндьийэтин уонна диплом суругу туттулар. Дьэ, уон бастыҥ үөрэнээччилэр кимнээхтэрий? Көрүөххэйиҥ:
- Семен Необутов, Дьокуускайдааҕы кадетскай оскуола 11 кылааһын үөрэнээччитэ
- Кристина Дрозд, Өрөспүүбүлүкэтээҕи олимпийскай резерва училищатын 9 кылааһын үөрэнээччитэ
- Виктория Алексеева, Бүлүү улууһун Тылыгын орто оскуолатын 11 кылааһын үөрэнээччитэ
- Максим Поповский, Өлүөхүмэ оройуонун 4 №-дээх орто оскуола 11 кылааһын үөрэнээччитэ
- Магомед Наурузов, Мэҥэ Хаҥалас улууһун Аллараа Бэстээх М.Е.Попов аатынан орто оскуола 11 кылааһын үөрэнээччитэ
- Любовь Слепцова, Абый оройуонун А.Е.Слепцов аатынан орто оскуола 10 кылааһын үөрэнээччитэ
- Александра Дмитриева, Дьокуускайдааҕы В.П.Ларионов аатынан физико-техническай лицей 10 кылааһын үөрэнээччитэ
- Власий Югов, Дьокуускайдааҕы классическай гимназия 11 кылааһын үөрэнээччитэ
- Арсен Михайлов, Горнай улууһун А.Н.Осипов аатынан Бэрдьигэстээх орто оскуолатын 11 кылааһын үөрэнээччитэ
- Татьяна Гарипова, Өймөкөөн оройуонун Усть-Нера орто оскуолатын 11 кылааһын үөрэнээччитэ.
Оҕолорбут тус санаалара
Ил Дархан этиитин кэннэ, бүгүҥҥү тэрээһиҥҥэ кэлбит оҕолор ааттарыттан Дьокуускай куорат классическай гимназия 11 кылааһын үөрэнээччитэ Власий Югов маннык баҕа санаатын тиэртэ:
«Убаастабыллаах Ил Дархаммыт Айсен Сергеевич уонна манна мустан олорор доҕотторбут! Олус талааннаах, билиигэ-үөрэххэ тардыһар ыччаттар мустан олороллорун көрөннөр Улуу убайдарбыт, бастыҥ үөрэхтээхтэрбит Максим Аммосов, Платон Ойуунускай, Исидор Барахов уонна кинилэри кытта үлэлэспит улуу дьоннорбут билигин бааллара буоллар, киэн туттуо этилэр. Өрөспүүбүлүкэ бары оҕолорун аатыттан учууталларбытыгар махталбытын тиэрдэбит. Эһиги сыраҕыт, кыһамньыгыт биһиги ситиһиибит. Айсен Сергеевич, эйиэхэ эмиэ улахан махтал! Саха сирин бүттүүн оҕото, ыччата куруук инники күөҥҥэ сылдьарын туһугар бастыҥ усулуобуйалары тэрийэҕит. Өссө да тобуллар толкуйбутунан үөрдэ туруохпут. Кэлэн иһэр саҥа дьылынан!»
Ити курдук, үтүө үгэскэ кубулуйбут, бастыҥ үөрэнээччилэри чиэстиир Ил Дархан харыйата олус сэргэхтик ааста. Бу күн кэлбит хас биирдии оҕо Саха сирин сайдарыгар кыһаллыа, инникитин сытыы-хотуу, тобуллаҕас өйдөөх уонна бэйэтин тус санаатыгар кытаанах тирэхтээх көлүөнэ буола үүнүө-сайдыа, чэчириэ диэн эрэнэбит. Бүгүн кэлбит оҕо баҕа санаата туолан, сулустуу сандаардын!
keskil14.ru