Норуоттар икки ардыларынааҕы «Азия оҕолоро» VIII спортивнай оонньууларга «Кэскил» оҕо бэчээтин кыһатын эдэр кэрэспэдьиэннэрэ таһаарыылаахтык үлэлээтибит.
Өссө олунньу ыйга күүстээх сүүмэрдээһини ааһаммыт өрөспүүбүлүкэ араас муннугуттан 50 бастыҥ юнкордар талыллан, эппиэтинэһи, биһиэхэ эрэбили өйдөөн туран, улахан таһымнаах тэрээһини сырдаттыбыт.
Үлэ сааскыттан саҕаламмыта. Олорор нэһилиэкпит, улууспут спорстсмен оҕолорун, өрөспүүбүлүкэ чиэһин көмүскүүр хамаандалар тустарынан суруйан, видео устан саҕалаабыппыт. Онтон докумуон хомуйсан, аккредитация ааһан, куратордар ананан, хамаандаларга арахсан, ханнык спорт көрүҥүн сырдатыахтаахпытын тыырсан, онно бэлэмнэнии буолбута.
Айаннаан кэлэрим бэйэтэ туспа историялаах. Бастатан туран, долгуйарым диэн IX кылаас буоламмын, сүрүн государственнай эксээмэни туттарыы этэ. Кырдьык даҕаны киһи чаҕыйар, куттанар эбит. Ол гынан баран баҕа санаабын сыал оҥорон, күстээхтик бэлэмнэнэн бүтэһик эксээмэммин бэс ыйын 11 күнүгэр туттаран баран, бэйэбэр эрэнэн, бэс ыйын 13 күнүгэр киэһээ 6 чааска бөртөлүөккэ уочараттыы барбытым. Элбэх киин улуус оҕолоро соһуйуохтара да буоллар, олорор Кустуур нэһилиэкпититтэн улуус киинигэр барарбытыгар киэһэ 6 чаастан саҕалааан, сарсыарда 10 чааска дылы түүннэри дьаһалта дьиэтин иннигэр таһырдьа уочараттыыбыт. Уочараттыы барарбар чугас доҕотторум аргыс буола барсыбыттара. Айгелана Стручкова, Таня Слепцова, Надя Колесова буолан түүнү быһа мэниктээн, оонньоон, күлүүлээх да буоллар, сиэмэчкэ сии-сии арааһы кэпсэтэн, бириэмэ биллибэккэ ааспыт курдук этэ. Түүн ардахтаан, алдьархай уочараттааһын этэ. Сарсыарда 10 чааска билиэккэ тиксэн, үөрэн-көтөн улууспут киинигэр кэлэн докумуон хомуйсан, балыыһаҕа көрдөрүнэн саҕалаабытым. Онно эдьийбэр Северьяна Потаповаҕа махталым улахан. Миигин илдьэ сылдьан, ыйан-кэрдэн биэрэн дьыалабын барытын ситиспитим. Бэс ыйын 20 күнүгэр Саккырыыр-Дьокуускай хайысханан көтөн кэлэрбэр күүс-көмө буолбут дьоммор, ол эбэтэр Эбээн Бытантай национальнай улууһун Үөрэҕириитин саламтатыгар Петр Григорьевич Потаповка уонна Люциана Эдуардовна Гороховаҕа махталбын тириэрдэбин.
Дьокуускайга кэлэн тыа хаһаайыстыбатын уопсай дьиэтигэр түһэн элбэх оҕону кытта билсэн, доҕотторум биллэ элбээтилэр. Уопсайга күҥҥэ үстэ тото-хана, наһаа минньигэстик аһаталлар. Хоту дойду оҕото буоламмын, хортуоскалаах соркуойу, дьаабылыканы астына-астына сиэтим. Биһиги итинник аһы сыл баһыгар-атаҕар сиибит.
«Азия оҕолоро» спортивнай оонньууну сырдатыы, маннык улахан таһымнаах тэрээһиҥҥэ үлэ эдэр кэрэспэдьиэннэр сайдалларыгар чиҥ акылаат буолла. Үлэлэрбит күннэтэ ВКонтакте куйаар ситимигэр, keskil14.ru саайтка, «Кэскил» хаһыакка, НВК ханаалга тахсан, дьон-сэргэ сэҥээриитин ылбытыттан биһи үөрдүбүт, кынаттанныбыт. Аҕааччылар, көрөөччүлэр көрөр матырыйаалларыгар төһөлөөх элбэх үлэ сытарый? Сценарий бэлэмнээһинэ, матырыйаалы суруйуу, видеоҕа устуу, интервью ылыыта, монтаж үлэтэ олус элбэх. Ол да буоллар оҕолор үлэттэн чаҕыйбакка, биир иллээх дьиэ кэргэн буолан үлэлээтибит. Күнүскү күүстээх үлэ кэнниттэн киэһэ өттүгэр култуурунай тэрээһиннэргэ сылдьааччыбыт. Түүлбэр эрэ көрөр ырыаһыттарбын көрөн, бу түгэн барыта сүрэхпэр хатанна. Бу кэлэ сылдьан өссө төгүл суруналыыс хайаан да буолуохтаахпын диэн бэйэбэр сыал туруорунан, өттүк харалаах, илии тутурдаах, умнуллубат түгэннэрдээх, халыҥ уопуттаах дойдубар кэллим.
Элбэх араас дойдуттан доҕордонон, атын омук култууратын билэн, эйгэбит олуһун кэҥээтэ.
Биир ииллээх дьиэ кэргэн курдук, икки араас көлүөнэ — куратор уонна эдэр кэрэспэндьиэн бэйэ бэйэлэрин өйдөһөн маннык түмүктээх үлэ таҕыста. Ольга Ивановна Семенова салайааччылаах «Кэскил» оҕо бэчээтин кыһатын бары үлэһиттэригэр истиҥ махталбын тиэрдэбин! «Азия оҕолоро» VIII спортивнай оонньуу өйбөр-сүрэхпэр өр сылларга хаалыа.
Наум Наумов, IX кылаас,
И.Н. Слепцов аатынан Кустуур орто оскуолата, Эбээн Бытантай национальнай улууһа,
«Азия оҕолоро» пресс-киин эдэр кэрэспэдьиэнэ