Биһиги, «Кэскил» медиа оскуола эдэр кэрэспэдьиэннэрэ, сылы эргиччи үлэлиибит. Үөрэх дьылын устата сүүһүнэн ахсааннаах ыстатыйаны, видео роликтары оҥорон таһаарабыт. Нэһилиэкпит олоҕун туһунан дьоҥҥо-сэргэҕэ сырдатабыт, кэпсиибит. От ыйын 7-12 күннэригэр Таатта улууһугар Ытык Күөлгэ ыытыллыбыт күрэс төрүт көрүҥнэригэр XXII «Манчаары оонньууларын» сырдатыытыгар үлэлээтибит https://vk.com/@keskilmedia-xxii-manchaary-oonnuulara
***
Сыл устата медиа оскуолаҕа үөрэммиппитин дьиҥнээх үлэҕэ көрдөрдүбүт. Өссө элбэҕи биллибит. Үлэбит кэмигэр «Ааҕар чаас» буолбута. Онно төгүрүччү олорон, хас биирдиибит www.keskil14.ru саайка тахсыбыт ыстатыйаларбытын доргуччу аахтыбыт. Атын оҕо суруйуутун ааҕан, истэн, уопут атастастыбыт. Тус бэйэм хас биирдии оҕо суруйуутун, кини туспа, ураты көрүүлээҕин сэргии иһиттим.
Үлэбитин «Ытык Тааттаҕа сүгүрүйэн» диэн видео ролигынан түмүктээтибит. Тааттатааҕы норуот тыйаатырын дьиэтигэр улуу суруйааччыларбыт мэтириэттэрин аттыгар туран кинилэр айымньыларыттан кэрчиктэри быһа тардан аахтыбыт. Түмүгэр олус истиҥ ролик оҥорон таһаардыбыт https://vk.com/wall-199463452_29558
Янис СЫСОЛЯТИН, VIII кылаас,
Лөгөй лиссиэй-интэринээт, Уус Алдан
***
Мин түөрт дьоруойдаах Байаҕантай нэһилиэгиттэн сылдьабын. Биһиги ханна да сырыттарбыт геройдарбыт ааттарын түһэн биэрбэт курдук эппиэтинэстээхтик сылдьыахтаахпыт.
Тааттаҕа буолан ааспыт күрэс төрүт көрүҥнэригэр XXII «Манчаары оонньууларыгар» оҕо пресс-киинигэр үлэлиирбитигэр эмиэ итинник эппиэтинэстээхтик сыһыаннаһан үлэлээтибит. Алта күн устата «Манчаары оонньууларын» сырдаттыбыт. Элбэххэ үөрэнним, үгүһү биллим-көрдүм. Улахан тэрээһини сырдатыы үлэтэ хайдах ыытылларын бэйбинэн биллим. Эрдэттэн былааннаан, сыал-сорук туруоран үлэлээбит буоламмыт, барыта сатанна. Инники өттүгэр сырдатыы үлэтигэр үөрүүнэн кыттыам этэ дии саныыбын.
Снежанна ГОТОВЦЕВА, VIII кылаас,
М.Н. Готовцев аатынан Танда орто оскуолата, Уус Алдан
***
Улахан тэрээһиҥҥэ үлэлиир маннык улахан кыах бэриллибититтэн ис дууhабыттан үөрэбин.
Сахалыы медиа эйгэтигэр үлэлиир биир саастыы оҕолорбун кытта билсэн, кинилэр оҥорон таһаарар үлэлэригэр үтүө сыһыан баарын көрөн биллим. Күн аайы туох баар өйбүн-санаабын барытын үлэбэр анаан сырыттым. Бэйэбэр элбэх саҥаны арыйдым. «Манчаары оонньууларыгар» эдэр кэрэспэдьиэн быһыытынан үлэлээбитим инники олохпор туhалыа диэн эрэнэбин.
Туйаара МАМОНТОВА, IX кылаас,
М.Н. Готовцев аатынан Танда орто оскуолата, Уус Алдан
XXII «Манчаары оонньууларын» сырдаппытым диэн куруук өйдүү-саныы сылдьыам. Олус үчүгэй тэрээһиннээх күрэхтэһии буолан ааста. Оҕолору кытта биир хамаанда буолан, бэйэ-бэйэбитин өйдөһөн, өйөһөн сырыттыбыт. «Манчаары оонньууларын» хаамыытын куратордарбыт оҥорбут медиа былааннарынан сирдэтэн сырдаттыбыт.
Авдей НЕУСТРОЕВ, IX кылаас, Маар орто оскуолата, Ньурба
***
Эдэр кэрэспэдьиэннэр, этэргэ дылы, түүннэри-күнүстэри, олус кыһаллан үлэлээтибит. Ол түмүгэр ааҕааччыларбыт XXII «Манчаары оонньууларын» туһунан сиһилии билэллэрин ситистибит. Оҕо пресс-киинигэр үлэлээбитим миэхэ улахан уопут буолла. Куратордарбыт биһигини өйөөн, сүбэлээн-амалаан илдьэ сырыттылар. «Манчаары оонньууларын» кэнниттэн өссө күүскэ үлэлииргэ, саҥаны айарга баҕа санаам күүһүрдэ.
Снежана ЯКОВЛЕВА, VIII кылаас,
Ф.Г. Охлопков аатынан Майа орто оскуолата, Мэҥэ Хаҥалас
***
Күрэс төрүт көрүҥнэригэр XXII «Манчаары оонньууларын» сырдатыга оҕо пресс-киинигэр үлэлээн, үйэҕэ умнуллубат түгэннэри атаардыбыт. Бу аҕыйах хонук иһигэр өйбүтүнэн-сүрэхпитинэн, тулуурбутунан, дьулуурбутунан олус элбэҕи эбиннибит, ситистибит. Биир дойдулааҕым Н.Е. Мординов-Амма Аччыгыйа аатын сүгэр «Кэскил» оҕо бэчээтин кыһата маннык үрдүк таһымнаах тэрээһиҥҥэ үлэлииргэ кыах биэрбитигэр махталым муҥура суох.
Яна ГУЗАИРОВА, Х кылаас,
Харбалаах орто оскуолата, Таатта
***
XXII «Манчаары оонньууларын» сырдатыыга үлэлээбиппиттэн олус үөрэбин. «Кэскил» медиа оскуолаҕа биһиги хамаанданан үлэлиибит. Ол иһин үлэни кыайа тутабыт, бэйэ-бэйэбитин истиһэбит, өйдөһөбүт. «Манчаары оонньууларын» бу иннинэ күрэс эрэ курдук саныыр этим. Онтукам ис хоһооно олус киэҥ, баай эбит. «Манчаары оонньуулара» биһиги омук төрүт үгэһин, тылын-өһүн – барытын түмэр күүстээх.
Алена ТАППЫРОВА, VIII кылаас,
В.И. Ленин аатынан Уолба орто оскуолата, Таатта