Ахсынньы 16 күнүгэр, тымныы күнү аахсыбакка, биһиги оскуолабытыгар икки «Норуодунай бэйиэт» диэн үрдүк ааттаах дьон ыалдьыттаан аастылар. Биир дойдулаахпыт, Амма улууһун киэн туттуута, элбэх айымньылар ааптардара, ураты буочардаах, кэрэ сэбэрэлээх Саргылаана Гольдерова – Саргы Куо, Аммалартан төрдүс «Норуодунай суруйааччы» буолбут үөрүүтүн үллэһиннэ.
Бу үрдүк ааты иҥэрбиттэрин кэнниттэн, биһиги, биир дойдулаахтара, ис сүрэхпититтэн олус үөрдүбүт, долгуйдубут, дьоллоннубут. Кинини кытта Саха сирин суруйааччыларын сойууһун бэрэсэдээтэлэ Наталья Харлампьева ыалдьыттаан кэллэ. Олус үчүгэйдик уонна долгутуулаахтык тыллары этэн көрсүһүүнү умнуллубат оҥордо. «Саргы Куо «Норуодунай бэйиэт» буолбутугар мин олус үөрдүм уонна соһуйбатым» диэн олус чопчутук эттэ. Чахчы, Саргылаана Гольдерова үлэлээбитэ элбэх, бу үрдүк ааты ылыан-ыллаҕа.
Маны таһынан биир дойдулаахтарбыт, эдэр суруйааччылар Зинаида Архипова, Любовь Матвеева – Сүүмэх кэлэн айар үлэлэригэр Саргы Куо көмөтүн, сүбэ-ама буолбутун сырдаттылар, истиҥник махтаннылар. Түөрт суруйааччы далбар хотуттар кып-кыра хоспутун кэҥэтэн, сылааһынан илгийэн, сырдыгынан сыдьаайан ахсынньы аам-даам тымныытын уҕарыттылар. Бастаан олус дьоһуннаахтык туттан киирэн баран, кэлин кэпсээннэрин, истээччилэрин умсулҕаныгар уйдаран олус иһирэх, истиҥ кэпсэтии буолан таҕыста.
Аҕыйах чаас иһигэр олус элбэҕи кэпсээтилэр, айымньыларын ааҕан иһитиннэрдилэр, ыйытыктарга хоруйдаатылар, бэйэлэрин кинигэлэрин бэлэх ууннулар. Маннык дьоро күнү туттуммахтаан, Саргы Куону эҕэрдэлээтибит, өйдөбүнньүк хаартыскаҕа түстүбүт. Бу күн тымныы буолан тэйиччиттэн олорон үөрэммиппит. Онтон эбиэт кэнниттэн ким баҕалаах кэлэн сылдьын диэбиттэригэр, төрөппүттэрбиттэн сөбүлэҥ сурук ылан оскуолабар кэлбитим. Мин, биир бэйэм, суруйааччылары кытта бастакы көрсүһүүм. Тэрээһиҥҥэ сылдьыбыппыттан олус астынным. Кэпсиир кэпсээннэригэр уйдаран бириэмэни билбэккэ хааллым.
Кэпсээн бүтээттэрин кытары бары ыйытыы бөҕө биэрдилэр. Ыалдьыттарбыт төһө даҕаны ыксыы олордоллор, хас биирдии ыйытыыга чопчу хоруйу биэрдилэр. Маны таһынан бары бэйэлэрэ суруйбут хоһооннорун ааҕан киэһэни өссө киэргэттилэр. Истэн олорбут көрөөччүлэр ытыстарын тыаһа тохтоло суох кутуллунна. Бу курдук ааттаах-суоллаах, олус интэриэһинэй кэпсээннээх ыалдьыттарбытын ыытымаары ыгылыйан да ыллыбыт. Ол эрээри, кинилэр сылдьыахтаах тэрээһиннэрин бириэмэтэ буолан сайыһа хаалан атаардыбыт.
Маннык курдук биир күммүтүн Сахабыт Сирэ бүттүүнэ билэр дьоно кэлэн киэргэттилэр, умнуллубат ураты түгэни бэлэхтээтилэр. Бириэмэ аттаран биһиэхэ ыалдьыттаабыттарыгар ис сүрэхпититтэн махтанабыт!
Владислав ПЕТРОВ, X кылаас үөрэнээччитэ
«АЛиК» медиа-киин
Л.В. Киренскэй аатынан Амматааҕы лиссиэй
keskil14.ru