Билии күнүгэр кэрэ Аммабыт үрдүгэр күн итиитэ үөрүүнү бэлэхтээтэ, сайыммытын сылаастык атаарда! Балаҕан ыйын 1 күнэ оҕоҕо да учууталга да олус долгутуулаах, кэтэһиилээх түгэн. Онтон оскуола боруогун маҥнайгытын атыллыыр кырачааннарга долгуйуу өссө бүк улаатар. Академик Л. В. Киренскэй аатын сүгэр Амматааҕы лицейгэ уопсайа 389 үөрэнээччититтэн 36 оҕо сибэкки дьөрбөлөөх үөрэн, долгуйан туран бастакы кылааска киирдэ. Быйылгы үөрэх сылыгар саамай эппиэтинэстээх 9 кылааска 40 үөрэнээччи эксээмэҥҥэ бэлэмнэнэллэр. Тапталлаах оскуолаларыттан саҥа олох үктэлигэр 24 оҕо куорсун анньынан тахсыахтара.
Бүтүн Арассыыйатааҕы «ЮНАВИА» военно-спортивнай күрэххэ кыттан боруонса мэтээли түөстэригэр кэппит биһиги оскуолабыт киэн туттар «Экипаж» хамаанда оҕолорун: Слепцов Алексейы, Пестеров Родиону, Сивцева Виолеттаны, Марков Костяны уонна Ефремов Айсены дьон-сэргэ иннигэр чиэстээтилэр.
Ону таһынан ытыктыыр учууталарбытыгар министиэристибэттэн наҕараада ыыттылар. Учууталларбыт үөрүүлэрин үллэстэн өссө бырааһынньыкпыт сырдаата.
Сырдыгынан сыдьаайар оскуолабытыгар 4 саҥа, эрэллээх, саҥалыы тыыннаах учууталлар кэллилэр. Саха тылын уонна литературатын үөрэтэр Боярова Зинаида Андреевна диэн эдэрдии эрчимнээх учуутал оскуолаҕа үлэлии кэллэ. «Тоҕо бу идэни талбыккытый?» диэн ыйытыыбын саҕалаатым. «Оҕо эрдэхпиттэн сахалыы тыыннаах иитиллибит буолан төрөөбүт тылбын сайыннарар, харыстыыр баҕаттан бу идэни талбытым. Учуутал буолар тус бэйэм уруккуттан баҕа санаам этэ. Ону толорон Амма ытык сиригэр үктэнним». «Оҕолортон тугу күтэҕин?» «Мин оҕолортон элбэҕи ирдээппин. Баара-суоҕа хорсуннук эппиэттиллэрин, саха тылы интэриэһиргииллэрин баҕарабын».
Онтон төрөппүттэн эмиэ аҕыйах ыйытыыны биэрдим. «Бу күҥҥэ туох санаалаах тураргытын үллэстиҥ». «Биһиги дьиэ кэргэммитигэр долгутуулаах күн буолла. Биһиги элбэҕи эрэнэр, ыал улахан оҕото, кыыспыт бастакы кылаас үөрэнээчитэ буолан үөрдүбүт-көттүбүт. Оҕобутунан киэн туттабыт, үөрэнэр суолун алҕыыбыт». «Бу сылга тугу кэтэһэҕитий?» «Оҕобут үөрэнэр кэмигэр барыта табыллан истин, ситиһиилээх буоллун, көхтөөхтүк барытыгар кыттыыны ылан истин, учууталлартан элбэх хайҕабыл ыллын уонна биллэн турар элбэх эрэллээх доҕоттору буллун» — диэн ийэтэ, аҕата үөрүүлэрин, долгуйууларын үллэһиннилэр.
Бу үөрэх сылыгар хас биирдии үөрэнээччигэ ситиһиини, экзаменнаах оҕолорго кыайыыны-хотууну, учууталарга уонна төрөпүттэргэ тулууру-дьулууру баҕарабын! Элбэх саҥа билиини ылыныҥ, айымньылаах, таһаарыылаах үлэни ыытыҥ. Барыгытыгар уу сахалыы Уруй, урааҥхайдыы Айхал буолуохтун! Бука бары доруобай, дьоллоох буолуҥ!
Аайа Кириллина, IX “Б” кылаас,
академик Л.В. Киренскэй аатынан Амматааҕы лицей
Зинаида Ивановна Бураева
видеота