Аҕа дойдуну көмүскээччи күнүн көрсө Ороһу орто оскуолатыгар тэрээһин буолан ааста.
Оскуола этэрээттэрин хамандыыра тохсус кылаас үөрэнээччитэ Владислав Таныков оскуола директорыгар Прокопий Устинович Никоновка, бастакы кылаастан уон биирис кылааска дылы бары устуруойдаан хаамыыга турдулар диэн араапардаата.
Ол кэнниттэн кылаас хамандыырдара биир-биир кэлэн директорга араапардаатыбыт. Онтон хас биирдии кылаас тус-туһунан устуруойдаан хаама-хаама байыаннай тиэмэҕэ суруллубут ырыалары ыллаан, хааман ньиргиттибит.
Хаамыы, ырыа, байыаннай таҥас-сап көрүү түмүгүнэн кылаас аайы миэстэлэри олохтоон грамоталары туттардылар.
Ол кэннэ Дүллүкү оскуолатыгар үөрэммит, Хотугу норуоттар оонньууларыгар успуорт маастара,
Орден Мужество кавалера, «Хорсунун иһин» мэтээл хаһаайына, Украинаҕа буола турар анал байыаннай дьайыыга хорсуннук олохтон туораабыт Степан Степанович Руфов чиэһигэр ыытыллыбыт «Снежный барс» күрэҕэр Ороһуттан «Патриот» хамаанда оҕолоругар ананан уһуллубут видеоны көрдүбүт. Кэлэр сылларга «Снежнай барс » күрэҕэр сылы быһа бэлэмнэнэн кыттар баҕалаахпыт.
Түгэнинэн туһанан, Үөһээ Бүлүүтээҕи «Кыһыл дружина» суолунан айаҥҥа (И.Н.Барахов 125 сылыгар, гражданскай сэрии 100 сылыгар Үөһээ-Бүлүү- Ньурба- Антоновка- Чаппанда-Далыр) көхтөөхтүк кыттыытын иһин бииргэ үөрэнэр табаарыспар Саша Егоровка Туоһу сурук туттардылар.
Сайаан Павлов, «Тымтык» эдкорпост, Ороһу.