Муус устар 10 күнүгэр М.Н. Готовцев аатынан Танда орто оскуолатыгар биир дойдулаахпыт, 1974-1979 сс. Танда орто оскуолатыгар саха тылын уонна литературатын учууталынан үлэлээбит, төрөөбүт сахабыт тылын аан дойдуга тарҕаппыт биллиилээх профессор, педагогика билимин дуоктара, саха тылын, литэрэтиирэтин уонна төрүт култуураны үөрэтии методикатын кафедратын профессора, РФ Норуоднай үөрэхтээһинин туйгуна, РФ Үрдүк үөрэҕин бочуоттаах үлэһитэ, Саха Өрөспүүбүлүкэтин Учууталларын учууталлара, АПиСН академига Степан Константинович Колодезников аатын саха тылын уонна литературатын кабинетыгар иҥэрии үөрүүлээх аһыллыыта буолан ааста. https://t.me/keskil_media2020/16162
Бу тэрээһиҥҥэ Степан Константинович бииргэ төрөөбүттэр, аймахтара, биир идэлээхтэрэ, бииргэ үөрэммит оҕолоро нэһилиэк баһылыга, Уус Алдан үөрэҕин управлениетыттан кэлэн кыттыыны ыллылар: Улюсова Ксения Константиновна, Саха Өрөспүүбүлүкэтин Идэлээх сойуустарын федерациятын туйгуна, Саха өрөспүүбүлүкэтин үөрэҕириитин бочуоттаах бэтэрээнэ;
Нафанаилова Нина Константиновна, Саха Өрөспүүбүлүкэтин доруобуйа харыстабылын туйгуна; Колодезников Федот Константинович, Саха Өрөспүүбүлүкэтин үөрэҕириитин туйгуна; Сивцева Наталия Сергеевна, тыл билимин хандьыдаата, Максим Кирович Амоссов аатынан Хотугулуу-Илиҥҥи Федеральнай универститет Арассыыйа Бэдэрээссийэтин Хотугулуу-Илиҥҥии норуоттарын тылларын уонна култуураларын үнүстүүтүн «Саха тылын, литэрэтиирэтин, төрүт култууратын оскуолаҕа үөрэтии» мэтиэдьикэтин хаапыдыратын сэбиэдиссэйэ, доцена; Билюкина Марианна Юрьевна, педагогика билимин хандьыдаата, Максим Кирович Аммосов аатынан Хотугулуу-Илиҥҥи үнүбэрситиэт Арассыыйа Бэдэрээссийэтин Хотугулуу-Илиҥҥи норуоттар тылларын уонна култуураларын үнстүүтүн саха литэрэтиирэтин хаапыдыратын доцена; Егоров Савва Иванович, нэһилиэкпит баһылыга; Никонов Иван Иванович, улуустааҕы үөрэх управлениетын начальнигын солбуйааччы.
Тэрээһини оскуолабыт саха тылын уонна литературатын учуутала Охлопкова Любовь Семеновна иилээн-саҕалаан ыытта. Аат иҥэрии үөрүүлээх түгэнин оскуолабыт дириэктэрэ Константин Георгиевич уонна Степан Константинович бииргэ төрөөбүттэрэ арыйдылар.
Бу тэрээһиҥҥэ Степан Константинович бииргэ төрөөбүт быраата Колодезников Федот Константинович уруһуйдара, тимир оҥоһуктара быыстапка буолан дьон болҕомтотун тарта. Биһиги оскуолабыт уонна Максим Кирович Аммосов аатынан Хотугулуу-Илиҥҥи университет инникитин бииргэ үлэлииргэ сөбүлэҥ түһэристилэр.
Степан Константинович бииргэ төрөөбүттэрэ, биир идэлээхтэрэ эҕэрдэ тыл уонна дириҥ ис хоһоонноох ахтыы оҥордулар. Анал стипендиялары анаатылар. Оскуолабыт үөрэнээччилэрэ Степан Константинович үлэтин хамнаһын сырдатар литературнай монтаж, «Маҥнайгы учуталбар» хор ылланан тэрээһини өссө тупсарда. Ону таһынан 7, 8, 9, 10 кылаас үөрэнээчилэригэр ХИФУ преподователья Сивцева Наталья Сергеевна Хотугулуу-Илиҥҥии норуоттарын тылларын уонна култуураларын инстутутун туһунан иһитиннэрии оҥордо.
Түмүккэ, төрөөбүт тылы харыстааҥ, саха буоларгытынан киэн туттун диэн баҕа санааларын эттилэр.
Биһиги Байаҕантай нэһилиэгин олохтоохторо, кэлэр кэнчээри ыччата Степан Константинович Колодезниковынан куруук киэн туттабыт, холобур оҥостобут
Снежанна ГОТОВЦЕВА, VIII кылаас,
М.Н. Готовцев аатынан Танда орто оскуолата, Уус Алдан
Туйаара Мамонтова хаартыскалара, видеота, IX кылаас