Ньурба улууһун дьоно-сэргэтэ Аҕа дойдуларын көмүскүүр анал байыаннай дьайыыга кыттыбыт хорсун буойуннарын ааттарын үйэтитэр сыаллаах. Ол курдук, А.Н. Чусовской аатынан Ньурбатааҕы техническэй лиссиэйгэ анал байыаннай дьайыы кыттыылаахтарыгар аналлаах стенд туруорулунна.
Бу стендэҕэ анал байыаннай дьайыы саҕаланыаҕыттан дойдуларын көмүскүү сылдьар биир дойдулаахтарбыт, лиссиэйбит учууталлара Аммосов Аркадий Аммосович уонна Кононов Владимир Владимирович хаартыскалара баар. Кинилэр бары биһиги хорсун санаалаах дьиҥнээх Геройдарбыт. Стендэ биһиги буойуттарбытынан киэн туттарбыт бэлиэтэ буолар.
Стендэ биир өттүгэр Саха сириттэн сылдьар Арассыыйа Геройдарын мөссүөннэрэ баар. Кинилэр истэригэр биһиги биир дойдулаахпыт, хорсун быһыытын иһин РФ Геройа диэн үрдүк наҕараадалаах штурмовик Андрей Григорьев-Тута баар.
Бу өйдөбүл стенд улуус олохтоохторугар, ыччакка патриотизм тыынын иҥэрэр. Ону таһынан, геройдарбыт дьиэ кэргэттэригэр өйөбүлбүтүн көрдөрөр суолталаах.
Виктория Тихонова, Ньурбатааҕы техническэй лиссиэй 10 «а» кылааһын үөрэнээччитэ, «Объектив» медиа-киин эдкора.
keskil14.ru