Тимофей Сметанин «Егор Чээрин» кэпсээнин, киинэтин көрбөтөх да, аахпатах да суох буолуохтаах. Онно саха уола массыына кузовар олорсон иһэн, куһу түҥнэри ытан түһэрбитин киһи бөҕө сөхпүт-махтайбыт суола.
Оттон ити сюжет дьиҥ чахчы олоххо буолбута: көтөн иһэр өстөөх сөмөлүөтүн таба ыппыт саха саллаата Үөһээ Бүлүү Тамалакааныгар олорбута.
Прокопьев Яков Спиридонович Белорусскай фроҥҥа кыһын сэриилэһэ тиийэр. Хаһаах уола доҕордонор. Биирдэ уоттаах сэрии кэмигэр “мээнэ гранатаны эһимэҥ, им-ньим олоруҥ” диэн бирикээс кэлбит. Сэбиэскэй уонна ньиэмэс сирин икки ардынан эмискэ өстөөх сөмөлүөтэ алларан көтөн иһэрэ көстөр. Онуоха хаһаах уола: “Табаарыс Прокопьев, ытан саай!”, — диир. Өс киирбэх Яков Спиридонович куһу ытарын санаан, үс төгүл субуруччу ытан саайар. Арай өстөөх сөмөлүөтэ алҕаска табыллан, хара буруону субуруппутунан аллара курулаан сууллан түһэр. Үөрүү-көтүү балысхана буолар. “Якут, молодец!”, — дии-дии үрдүгэр саба түһэллэр. Ол түүн аны ала буурҕа түһэр. Өстөөх траншеятыгар икки киһи хаама сылдьарын көрөн, били табаарыһа эмиэ “ыт” диэбитин истэн үстэ субуруччу ытан биирдэрин охторор, иккиһэ траншея иһигэр ньимис гынар. Сарсыарда үлүгэрдээх түрүбүөгэ буолар. Бука барыларын устуруойдаталлар. Яков Спиридонович бирикээһи кэспититтэн олус куттанар. Хата, дьолго, сөмөлүөтү суулларбытын уонна ньиэмэһи өлөрбүтүн иһин махтаналлар уонна үчүгэйдик ытарын иһин 45 мм пушка расчетугар көһөрөллөр.
Яков Спиридонович дойдутугар икки атаҕа суох тыыннаах эргиллэн кэлбитэ. Кини Кыһыл Сулус уордьаннаах, “Хорсунун иһин” , “Германияны Кыайыы иһин” уонна үбүлүөйүнэй мэтээллэрдээх. Бэргэн ытааччы, хорсун сэрииһит Яков Спиридонович 1984 с. олохтон туораабыта.
Саха саллааттара Аҕа дойду Улуу сэриитигэр оҥорбут хорсун быһыыларын, ааттарын-суолларын үйэлэргэ умнубат биһиги эбээһинэспит.
Яков Спиридонович Прокопьев хаартыската «Память народа» сайтан ылылынна.
Евдокия СЕМЕНОВА, Исидор Барахов аатынан СӨ түмэлин үлэһитэ.
keskil14.ru