Ньурбаҕа олунньу ый 3-5 күннэригэр көҥүл тустууга бастакы СССРС спордун маастара Данилов Дмитрий Максимович аатынан республикатааҕы көҥүл тустуу турнира өрө күүрүүлээхтик буолан ааста.
Күрэхтэһиигэ 2008-2009 сыллаах төрүөх уолаттар алта ыйааһыҥҥа туһуннулар, уопсайа 309 бөҕөс кытынна. Кинилэр төһө бэлэмнээх, эрчиллиилээх кэлбиттэрин көрөөччүлэр сэҥээрэн көрдүлэр, тустууктарга ыарыйдылар. Түмүгэр “Аан Дархан” аатын быһаарар киирсии уолаттарга ыытылынна. Амма бөҕөһө Винокуров Артём “Аан Дархан” аатын ылан илии тутуурдаах-өттүк харалаах барда. Бу тэрээһин туһунан тус кыттыылаахтартан туоһуластым.
Виталий Олегович Яковлев, Сунтаар улууһун оҕолорго тустуу тренера:
— Оҕолоргут бу күрэхтэһиигэ туох ситиһиилэннилэр?
— Уопсай хамаандаҕа үһүс буоллубут. Бастакы Дьокуускай, иккис Чурапчы улуустара. Личнайга биир чөмпүйүөн, биир иккис уонна үс үһүс миэстэлээхпит.
— Ньурбаҕа буолбут күрэхтэһии төһө бэркэ ааста?
— Үрдүк таһымҥа ааста, Сахабыт сирин элбэх хамаандалара кэлбиттэр, барыта үчүгэй.
— Тустууннан дьарыктанар оҕолорго баҕа санааҕыт.
— Тустуук оҕолорго баҕарыам этэ, биир да дьарыгы көтүппэккэ күүскэ дьарыктаныҥ уонна барыгытыгар ситиһиини!
Иванов Емельян, күрэхтэһии боруонска призёра:
— Көҥүл тустууннан хас сааскыттан дьарыктанаҕын? Бүгүн туох ситиһиилэнниҥ?
— Мин Иванов Емельян диэммин, 8 кылааспын, Киэҥ Ньурба бөҕөһө буолабын. Алтыс кылаастан дьарыктанабын, номнуо алтыс сылым барда. Санныбар травмаламмытын да иһин биир илиибинэн тустаммын үһүс миэстэ буоллум, бэйэм республика чемпионабын, Гоголев аатынан турнир кыайыылааҕабын.
—Тустуу эйиэхэ тугу биэрэрий?
— Бастатан туран, бэйэм күүс-күдэх ылабын, араас таһымнаах күрэхтэргэ кыттан эбиллэбин, астынан, сөбүлээн туран дьарыктанабын.
— Күрэх хайдах таһымҥа ааста дии санаатыҥ? Тустууннан дьарыктанар оҕолорго баҕа санааҥ.
— Ньурбаҕа буолбут тустуу күрэхтэһиитэ олус үчүгэйдик ааста дии санаатым, маннык күрэх биһиэхэ бастакытын ыытылынна. Тустуук оҕолорго доруобуйаны баҕарабын, барыта үчүгэй буоллун, уонна бастатан туран үөрэххитигэр кыһаллыҥ!
Бу курдук Дмитрий Данилов аатынан көҥүл тустууга Саха сирин оҕолорго хамаандаҕа сүүмэрдиир күрэхтэһиитэ Ньурба сиригэр бэркэ ааста. Кыайыылаахтар 2-лии мэдээл, анал статуэтка уонна кыайыылаах курун хаһаайыннара буоллулар.
Аан Дархан ааттаммыт оҕоҕо Sony X-box оонньуу приставкатын Үөдэй нэһилиэгин олохтоохторо, 25 тыһыынча харчыннан Ньурба нэһилилиэктэрин урукку баһылыктара, Үөдэй нэһилиэгиттэн төрүттээх тустуук уолаттарга баһылык Николаева Мария Пудовна 5-тии тыһыынча, Ньурба бастыҥ бөҕөстөрүгэр Ньурба тустуу федерациятыттан сыаналаах бириистэр уонна хас биирдии чөмпүйүөҥҥэ, призёрдарга өйдөбүнньүк бэлэх туттарылыннылар. Тэрээһини Саха сирин бастыҥ ыытааччыта Көрдүгэн – Александр Васильев кэлэн, ыытан дьон өссө эбии астынна, махтанна.
Бу курдук биир күүтүүлээх спортивнай тэрээһиммит түмүктэннэ.
Анжелина Жданова,
«Ыллык» эдкорпост, Ньурба, Хаҥалас