Ааспыт нэдиэлэҕэ т.н.д. А. Е. Слепцов аатынан Абый орто оскуолатыгар спорт нэдиэлэтэ буолан ааста.
Күрэхтэһии параадтан саҕаланна. Кылаабынай судьуйа, физкультура учуутала, С.В. Черемкин спортсменнарга ситиһиини баҕарда. «Ким күүстээх-ол кыайдын» диэн уопсай девиһинэн күрэхтэһиибит саҕаланна!
Алын кылаастар төрөппүттэрин кытта «Көрдөөх стартка” күрэхтэстилэр. Олус интэриэһинэй, сонун хайысхалаах, тыҥааһыннаах киирсиини көрдүбүт. Орто бөлөх үөрэнээччилэрэ (5-8 кылаастар) пионербол оонньоотулар. 1 миэстэни-7 кылаастар, 2 миэстэни-6 кылаас, 3 миэстэни бэһистэр ыланнар үөрдүлэр-көттүлэр. Оттон улахан кылаастар волейболга күрэхтэстилэр. Күүстээх киирсии түмүгэ: 1 миэстэни “Эрэл” хамаанда, 2 миэстэ- “Дохсун” хамаанда, 3 миэстэ-8 кылаас кэлэктиибэ.
Цифровой-гуманитарнай “Точка Роста” киин тэрийиитинэн дуобакка күрэхтэһии сыл ахсын ыытыллар. Бу сырыыга күүстээх дуобатчыттарынан, улахан бөлөххө, Люба Слепцова, Слава Дохунаев, Алеша Черемкин ааттаннылар. Орто бөлөххө-Алиана Давыдова, Женя Стручкова, Света Ядрихинская, оттон кыра бөлөххө-Богдан Стручков, Кирилл Никулин, Павлик Слепцов бастыҥ буоллулар.
Ити курдук, оскуолабытыгар олус интэриэһинэй нэдиэлэ ааспытынан биһиги олус астынныбыт.
Элеонора Ядрихинская, Абый орто оскуолатын 11 кылааһын үөрэнээччитэ, “Точка Роста” киин корреспондена.