Саха сирин оҕолорун “Манчаары оонньуулара” саҕаламмыттарынан Горнай улууһун баһылыга Никита Андреев эҕэрдэлиир.
Быйыл Горнай улууһа төрүттэммитэ 90 сыла. Бу бэлиэ суолталаах кэмҥэ улууспутугар XXI «Манчаары оонньуулара» ыытыллаллар. Спорт улахан түһүлгэтэ Горнай улууґугар буолара биһиэхэ улахан үөрүү. Тоҕо диэтэххэ, Саха сирин спортивнай историятыгар киирэбит. Улууспут историятын, олоҕун-дьаһаҕын, култууратын, биллиилээх дьонун туһунан киэҥ эйгэни хабан кэпсиибит, көрдөрөбүт. Тапталлаах Горнайбытыгар саҥа тутуулар олоххо киирэллэр. Эдэрдиин, кырдьаҕастыын — бары бииргэ түмсэбит. Спорт үүнүүнү-сайдыыны, түмсүүнү тосхойор.
“Манчаары оонньууларын” бэлиэлэрэ — Тургун диэн тайах, чэпчэки атлетиканы көрдөрөр. Бэргэн — бизон, спортсменнар эт-сиин, өй-санаа өттүнэн кыахтарын кэпсиир. Кырсаада — Горнайга Кэптинтэн Сиинэ үрэҕи батыһа хойуутук үүнэр сибэкки, кэрэ көстүүнү кэрэһэлиир.
Саха сирин оҕолорун Горнай улууһугар ыытыллар “Манчаары оонньуулара” саҕаламмыттарынан эҕэрдэлиибин. Биһиги улууспут туһунан тугу билбиккитин @kolokolchik_chuoraanchik суруйуҥ, кэпсээҥ.
Горнай улууһун устун кэрэхсэбиллээх айаны баҕарабын.
Никита Андреев, Горнай улууһун баһылыга.
Горнай — ураты дойду
Саха олоҕо, киэҥ толкуйа, санаатын күүһэ, кэрэни айан, оҥорон таһаарыыта — барыта айылҕаны кытта ситимнээх. Горнай улууґа — ураты айылҕалаах дойду. Кини кэрэ көстүүтэ саха дьонугар норуодунай суруйааччылар Сэмэн, Софрон Даниловтар, Савва Тарасов, талааннаах суруйааччы Петр Аввакумов, норуодунай худуоһунньук-модельер Афанасий Осипов, худуоһунньук-модельер Августина Филиппова курдук биллиилээх дьону бэлэхтээбитэ. Кинилэр саха норуотугар киэҥ аартыктары арыйбыттара. Ол аартык устун айаннаан, үүнэн-сайдан иһэбит, кэрэни кэрэхсиибит, Өйбүтүн-санаабытын байытабыт.
Оҕолоор, XXI «Манчаары оонньуулара» ыытыллар Горнай улууһун туһунан бу күннэргэ эһиги элбэҕи билиэххит, өйгүтүн-санааҕытын байытыаххыт диэн эрэнэбин. Горнай улууһуттан үүнэн-сайдан тахсыбыт саха талааннаах дьоно эппит-тыыммыт үтүө тылларын өйгүтүгэр- — санааҕытыгар иҥэриниҥ, үлэһит, киһи киһитэ буолан тахсаргытыгар туһаныҥ.
Александра Алексеева, Семён уонна Софрон Даниловтар ааттарынан Духуобунас киинин дириэктэрэ, Бэрдьигэстээх, Горнай.
Олохпутугар үөрүү элбэх буоллаҕына, сайдарга, айарга-тутарга кыахпыт улаатар
Горнай улууһугар XXI «Манчаары оонньуулара» саҕаланнылар. Оттон Өлүөхүмэҕэ Олоҥхо ыһыаҕа буолан ааста. Тоҕо өрөспүүблүкэ улуустарыгар маннык тэрээһиннэр сылы көтүппэккэ, ыытыллан иһэллэрий? Тоҕо диэтэххэ, улууска дьон-сэргэ сэргэхсийэр, үөрэр-көтөр, үтүө санаалаах, күүрээннээх уонна түмсүүлээх буолар. Олохпутугар үөрүү элбэх буоллаҕына, сайдарга, айарга-тутарга кыахпыт улаатар. Ол кыахпыт дьиэ кэргэнтэн тутулуктаах. Дьиэ кэргэн иһигэр үчүгэй эйгэ тэрилиннэҕинэ эһиги, оҕолор, дьоллоох оҕо сааска уйаламмыт буолаҕыт.
Күндү оҕолор! Эһиги бука барыгытын Саха сирин спортивнай бырааһынньыгынан эҕэрдэлиибин. Горнай улууһун оҕолоругар «Манчаары оонньууларын» тэрээһиннэригэр кыттыбыт үлэҕит туһунан @kolokolchik_chuoraanchik суруйан ыытаргытыгар баҕарабын. Аны түөрт сылынан спорт бырааһынньыга ханнык улууска буолуоҕай? Ол улуус оҕолорун кытта уопуккутун, көрүүлэргитин @kolokolchik_chuoraanchik нөҥүө үллэстиэххит диэн эрэнэбин.
Ольга Семенова, «Кэскил» оҕо бэчээтин кыһатын дириэктэрэ.